Mehmet Görmez, kryetari i Departamentit të Çështjeve Fetare të Turqisë, Diyanet-it, u ka dërguar një letër plot 135 vendeve, duke i paralajmëruar për rrezikun që paraqet Organizata Terroriste Gyleniste, FETÖ, e duke i nxitur t’i shkëpusin lidhjet me të nëse ato ekzistojnë.
Në letër risillet në vëmendje përpjekja e përgjakshme për grusht shteti, si dhe 241 të vrarët e 2.194 të plagosurit prej saj.
Siç raporton e përditshmja turke Yeni Şafak, në letrën e dërguar 135 vendeve, ku përfshihen Azerbajxhani, Rusia, Bosnjë-Hercegovina, Gjeorgjia, Bullgaria, Kosova, Lituania, Moldavia, Taxhikistani, Greqia, Pakistani, Arabia Saudite, India, Brazili, Kili dhe Etiopia, thuhet mes të tjerash: “Terroristët e FETÖ-s po vrasin civilë pa ngurrim; prandaj kjo lloj organizate është kërcënim për çdo vend.”
“Këta terroristë mund të fshihen në mënyrë të suksesshme si kameleonë, duke u sjellë sikur qëllimi i tyre është krijimi i një atmosfere paqeje, të bazuar në dialogun, në tolerancën ndërfetare dhe në mirëkuptimin,” lexohet mes rreshtave të letrës të drejtuesit të Diyanet-it.
Görmez u bën thirrje këtyre 135 vendeve të nxjerrin mësime nga ajo që ngjau në Turqi, e t’i shkëpusin lidhjet me grupin terrorist.
“Eshtë detyrë e të gjithë miqve të Turqisë t’i shkëpusin të gjitha lidhjet me terroristët,” shkruan ai.
Edhe pse Shqipëria nuk përmendet më sipër në raportimin gazetaresk, ashtu si shumë shtete të tjera, ajo duhet të jetë me shumë gjasa në listën e 135 vendeve që u është dërguar letra e kryetarit të Diyanet-it. /tesheshi.com/
