Banka Botërore deklaroi se lëvrimi i kredisë 1.2 miliardë dollarë, që akordoi për Shqipërinë është i lidhur me ecurinë e reformave dhe realizimin e investimeve në terren.
“Ne ramë dakort që qeveria të shlyente borxhet e prapambetura ndaj biznesit dhe kjo u realizua. Ramë dakort për reformën e pensioneve dhe ajo nisi. Ju mund t’i quani këto kushte, por ne i quajmë veprime të domosdoshme. Kjo ishte marrëveshja që mundësoi akordimin e një pjese të financimeve. Për pjesën tjetër që lidhet me investimet, ka një tjetër kriter. Ne do të shohim rezultatet, pra si ecën realizimi. Nëse projektet ecin sipas afateve, financimet disbursohen, nëse realizimi ecën ngadalë atëherë financimet ndalen”, thotë Tahseen Sayed, Drejtore e BB për Shqipërinë.
Qëllimi kryesor i marrëveshjes mes Bankës dhe Qeverisë është rimëkëmbja e ekonomisë. Por si do të përdoren financimet për të arritur këtë objektiv?
“Shuma e rënë dakort është 1.2 miliardë dollarë. Nga këto 450 milionë janë aprovuar për projekte që këtë vit. Pra mbeten dhe 750 milionë dollarë të tjera, të cilat veç konsolidimit makro dhe atij financiar, do të shkojnë kryesisht për investime në infrastrukturë që mbështesin turizmin. Ne e shikojme turizmin si një nga kontribuesit kryesor të rritjes ekonomike në vijim. Paralelisht do të ketë investime në menaxhimin e tokës, dhe për herë edhe për aftësitë dhe punësimin e të rinjve”, shton Sayed.
Sayed thotë se përfitimet e këtij programi për publikun dhe ekonominë do të jenë të larta, por njëkohësisht pranon që ka edhe rreziqe.
“Rreziku më i madh është ai që lidhet me qëllimin kryesor të programit, rritjen ekonomike. Nëse situata në Eurozonë, në vendet fqinje do të jetë e pastabilizuar dhe sfiduese atëherë kjo do të përbënte një rrezik për objektivat e këtij programi dhe rritjen ekonomike të vendit”, shprehet Sayed.
Sipas Drejtores së BB për Shqipërinë, ka vetëm një kusht themelor për zbutjen e këtyre rreziqeve.
“Ruajtja e ritmit te reformave, veçanërisht në sektorin e energjisë, sepse ajo është kollona që do të mundësojë rritjen ekonomike në të ardhmen dhe zhvillimin e vendit”, përfundon ajo.
