Unioni i Gjyqtarëve i mbledhur të premten vendosi me unanimitet që t’i drejtohet Gjykatës Kushtetuese për ta shfuqizuar pa asnjë ekuivok ligjin e Vetting-ut, me arsyetimin se ka papajtueshmëri me Kushtetutën.
“Mund të jetë aluduar që Unioni nuk e do reformën apo është kundër saj. Unioni nuk është kundër kontrollit, është pro, por sipas frymës së dispozitave kushtetuese të miratuara me unanimitet në Parlament në korrik të këtij viti. Dhe neve na takon që të dërgojmë mendimet tona sesi do të paraqitet Unioni në seancën gjyqësore që do të zhvillohet në Gjykatën Kushtetuese, që ka si objekt kundërshtimin e ligjit për kontrollin dhe vlerësimin e gjyqtarëve”, deklaroi Gerd Hoxha, kryetar i Unionit.
Ndërkohë, Vettingu ndodhet në Venecia i dërguar nga Kushtetuesja për t’i marrë mendim. Por ndërsa deri atje e çoi politika – pra opozita me dërgimin e ligjit në Kushtetuese – tashmë janë “viktimat” e pritshme të ligjit që janë bërë bashkë për t’i bërë ballë.
Kjo nuk është hera e parë që njerëzit e drejtësisë mblidhen “grusht bashkuar” në mbrojtje të interesave të tyre, edhe pse me referencë ligjore. Reagime të tilla kanë qenë të shpeshta vitet e fundit sa herë që është atakuar drejtësia. /tesheshi.com/
