Drejt fundit hetimi i shpërthimeve vdekjeprurëse në Ankara: pritet të mësohet se kush qenë planifikuesit dhe ekzekutuesit

Zëvendëskryeministri turk, Numan Kurtulmush, ka deklaruar vonë në mbrëmjen e së hënës se hetimi mbi shpërthimet e së shtunës në Ankara ishte në “fazën e tij finale, e pak a shumë i përfunduar”.

“Sulmin e kryen dy bombahedhës vetëvrasës, dhe është kuptuar se çdonjëri prej tyre përdori rreth pesë kilogramë lëndë shpërthese TNT,” u tha Kurtulmush gazetarëve në Ankara.

Por ai nuk i bëri të ditur gjinitë apo identitetet e të dyshuarve, duke iu përmbajtur urdhrit të organeve hetuese.

Edhe kryeministri i vendit, Ahmet Davutoglu, pati deklaruar më herët të hënën se gjendeshin pranë identifikimit të dy personave që i kryen shpërthimet, si dhe të organizatës që i ideoi ato.

Dy shpërthime të fuqishme të shtunën pranë stacionit të trenit në Ankara u morën jetën së paku 97 personave dhe lanë të plagosur 246 të tjerë, një pjesë e të cilëve janë në gjendje kritike. Në atë kohë po përgatitej nisja e një manifestimi paqësor, dhe në zonën rreth stacionit të trenit kishte dyndje njerëzish.

Ky ishte sulmi më i përgjakshëm në Turqi, dhe pason një seri incidentesh vdekjeprurëse që kanë ngjarë pandërprerë gjatë muajve të fundit. Vendi bëhet gati për zgjedhjet e parakohshme, që do të zhvillohen më 1 nëntor, ndërsa situata në vend ka njohur një përkeqësim të dukshëm. /tesheshi.com/