Konflikti gjashtëvjeçar në Siri i ka shtyrë miliona njerëz të lënë vendin e tyre e të enden tej kufijve si refugjatë, ashtu siç i ka detyruar miliona të tjerë të zhvendosen brenda hapësirës siriane.
OKB-ja deklaron se numri i atyre që kanë ikur prej konfliktit e që njihen si refugjatë i kalon tani të pesë milionët.
UNHCR-ja, agjencia për refugjatët, njoftoi përmes faqes së saj elektronike se në tre muajt e parë të këtij viti janë regjistruar si refugjatë më shumë se 250.000 sirianë të tjerë, duke e çuar numrin e përgjithshëm të tyre në 5.1 milionë.
Turqia mbetet vendi më krahëhapur për refugjatët sirianë, duke strehuar rreth tre milionë prej tyre. Në Liban ka më shumë se një milion refugjatë; Jordania është strehë për 657.000 të tjerë. Iraku, Egjipti e ca vende afrikanoveriore kanë po ashtu refugjatë sirianë.
Mijëra sirianë kanë mbërritur dhe në Europë, por jo të tërë kanë arritur të marrin statusin e refugjatit.
E njëjta agjenci e OKB-së, UNHCR-ja, çmon se 6.3 milionë sirianë janë zhvendosur brenda vendit. /tesheshi.com/
