Një agenci sekrete brenda radhëve të gjyqtarëve dhe prokurorëve, të cilët do të ndjekin “këmba këmbës” të korruptuarit.
Ky është propozimi më I fundit që vjen nga ekspertët e komisionit parlamentar për reformën në drejtësi.
Me një fjalë, do të krijohet një zyrë e cila do të rekrutojë spiunë, do të përgjojë telefonatat dhe mbledhë provat. Po a do të funksionojë?! Një të tillë e ka edhe policia që është SHKB që përgjithësisht ka qenë si një lloj mashë në duart e shefave pèër gjueti shtrigash. Korrupsioni luftohet vetëm nga ai organ kushtetues që ka mundësitë ligjore dhe garancitë për të hartuar akuzat dhe arrestuar hajdutat; Prokuroria e Republikës. Agjenci të tjera sidomos në Shqipëri që është vend I vogël dhe jo federal si SHBA apo Gjermania, nuk pinë ujë.
Sipas draftit paraprak, një grup zyrtarësh me të kaluar të pastër do të punojnë në agjenncinë e re që do të kontrollohet nga Parlamenti.
Bëhet fjalë për Byronë e Hetimit, e cila u hodh një herë poshtë nga Gjykata Kushtetuese por që tani do të rivihen në ligj duke iu bashkëngjitur korpusit të reformës në drejtësi.
Kjo do të bëhet duke ndryshuar Kushtetutën e cila të parashikojë edhe krijimin e një policie të specializuar, përgjegjëse për rastet e rënda të korrupsionit, sikurse mund të jetë Byroja Kombëtare e Hetimit apo një formë tjetër e përshtatshme.
Ngritja e një agjencie të posaçme kundër korrupsionit, është një model që gjendet edhe në vende të tjera të Ballkanit. Në Kroaci Zyra për Ndalimin e Korrupsionit dhe Krimit të Organizuar (USKOK) është një departament i specializuar i Zyrës së Prokurorit të Përgjithshëm dhe ka mandatin për të drejtuar hetimet policore dhe ndjekjet penale të kryera per korrupsionin dhe rastet e krimit të organizuar brenda juridiksionit të saj.
Edhe në Rumani, funksionon Drejtoria Kombëtare Kundër Korrupsionit, e ngarkuar me parandalimin, hetimin dhe ndjekjen e veprave që lidhen me korrupsionin. Por këta janë kompetencë e Prokurorisë së Përgjithshme. /tesheshi.com/
