Hashim Thaçi, më datë 26 shkurt 2016, nën masa të rrepta të sigurimit brenda ashtu dhe jashtë Kuvendit, u zgjodh presidenti i pestë i Kosovës. Detyrën e presidentit e mori më 7 prill 2016, pas betimit solemn në institucionin ligjvënës.
Zgjedhja e tij në postin më të lartë të shtetit zgjoi jo pak reagime, ku zërat më kundërshtues vinin jo nga LDK-ja e Ibrahim Rugovës, pasi falë votave të shumicës së deputetëve të kësaj partie u ul në karrigen e të parit të shtetit, por nga partia e parë opozitare, Lëvizja Vetëvendosje, e cila e bëri të qartë se Thaçin nuk e njeh si president, pasi është njeriu që i ka bërë shumë dëme vendit.
Sekretari i Vetëvendosjes, Dardan Molliqaj, më datë 31 mars të këtij viti, në një intervistë dhënë për një nga mediat kosovare, tha se VV-ja në asnjë rrethanë nuk e njeh Thaçin si president të vendit.
“Hashim Thaçi mund të jetë çkado, përveç president i njëmendtë i Republikës së Kosovës. Normalisht që ne nuk e njohim dhe nuk do të marrim pjesë në takimet që do të mund t’i thërriste ai. Nuk ka kuptim që të pranohet si president, dhe të pritet zgjidhje nga takimet me të, një person i cili e ka shkelur Kushtetutën e vendit dhe është një nga përgjegjësit kryesorë për krizën politike, ekonomike dhe sociale, në Kosovë,” tha asokohe Molliqaj.
Por tetë muaj pas zgjedhjet së Thaçit në krye të shtetit, ka edhe përfaqësues të lartë të kësaj lëvizje që tashmë e njohin si president, të paktën përmes shkrimeve që bëjnë, pasi i referohen si i tillë. Është zëdhënësi më i ri i VV-së, Shkodrat Hoti, që Thaçin e quan president, pra, e njeh të tillë.
Presidenti Thaçi sonte në mbrëmje do të jetë mysafir i gazetares Jeta Xharra në emisionin Jeta në Kosovë, me ç’rast kjo e fundit në paralajmërimin se do të zhvillojë intervistë me të ka shkruar se të interesuarit mund të shkruajnë pyetje për presidentin dhe ajo më pas disa prej tyre do t’i lexojë në emision. Në mesin e shumë pyetjeve që kanë parashtruar qytetarët, portali tesheshi.com ka hasur edhe një pyetje që ka parashtruar zëdhënësi i VV-së, Shkodran Hoti, i cili i adresohet Thaçit si president. Pyetja e zëdhënësit të VV-së: “Pse nuk deklarohet asnjëherë Presidenti Hashim Thaçi për vrasjen e Behajdin Allaqit dhe Ali Ukës? Cila është e vërteta e këtyre dy vrasjeve mizore?”
Pra, ky postim lë të kuptohet se brenda VV-së ka edhe të tillë që tashmë e njohin Thaçin president, pasi ashtu e quajnë. Mbetet të shihet nëse krerët e VV-së do ta qortojnë apo jo zëdhënësin e tyre për çështjen në fjalë, apo thjesht Hoti e ka quajtur padashje Thaçin president… /tesheshi.com/
