Kryeministri Edi Rama anulloi urdhërin e ministrit teknik të Drejtësisë, sipas të cilit dorëheqjet e drejtuesve të zyrave të hipotekës nuk do të pranoheshin.
Vetëm pak orë pasi Ministria e Drejtësisë publikoi urdhërin e ministrit Gazment Bardhi, ka reaguar kryeministri Rama, i cili ka bërë të qartë se dorëheqjet nuk mund të refuzohen dhe hetimi administrativ mund të vazhdojë pa asnjë pengesë.
“Nëse nga hetimi administrativ do të verifikohen shkelje të ligjit, regjistruesit që i kanë bërë këto shkelje duhet të shkojnë përpara drejtësisë.
Qeveria shqiptare ka një Kod Sjelljeje, të miratuar me VKM, qysh në mbledhjen e saj të parë dhe asnjë ministër, qoftë politik a teknik, qoftë në ikje a në ndenje, nuk mund ta shkele këtë Kod, i cili përcakton qartë se qeveria nuk është një grup individësh që veprojnë në kokën e tyre, po një skuadër që drejtohet nga Kryeministri dhe funksionon mbi bazën e parimit të thjeshtë të aprovimit paraprak nga Kryeministri, të veprimeve administrative apo komunikimeve të ministrave me publikun”, thuhet në reagimin e zyrës së Kryeministrit.
Ministria e Drejtësisë bëri të ditur gjatë paradites se “duke vlerësuar se dorëheqjet vijnë në vijim të konstatimit publik të Kryeministrit të Shqipërisë, se këta funksionarë publikë kanë shkelur në mënyrë flagrante të drejtat e qytetarëve, duke konsumuar një tallje kolektive dhe individuale me njerëzit, ministri i Drejtësisë ka marrë një vendim të ndërmjetëm, për pezullimin e procedurave të miratimit të dorëheqjes së tyre, deri në përfundimin e një hetimi të plotëadministrativ mbi veprimtarinë e këtyre funksionarëve publikë”. /tesheshi.com/
