Mediat serbe kanë shkruar sot se Uashingtoni do të vazhdojë ofensivën e tij diplomatike për të siguruar që Ballkani të jetë një rajon i qetë dhe i stabilizuar.
Gazeta më e madhe serbe Blic flet për një takim që presidenti i SHBA-së, Donald Trump dhe zëvendësi i tij Mike Pence do të zhvillojnë në fund të shtatorit me liderët e disa vendeve ballkanike, në mënyrë që paqja mes serbëve dhe shqiptarëve të vuloset përfundimisht.
Blic flet në fakt për një mundësi takimi të Trump me presidentin Vuçiç, por nënkupton edhe takime të tjera në kuadër të vazhdimit të dialogut Prishtinë-Beograd dhe me gjerë.
Në këtë logjikë të medias serbe mund të zhvillohet edhe një takim mes Trump dhe kryeministrit shqiptar, Edi Rama, por edhe kreut të qeverisë së Kosovës, që pritet të zgjidhet pas 24 gushtit.
Në fakt duhet pritur të zgjidhet edhe qeveria e re e Edi Ramës në shator, dhe të përcaktohet se kush do të përfaqësojë Shqipërinë në OKB: Presidenti i Republikës, Ilir Meta, apo Kryeministri Edi Rama.
Ky i fundit duket më i avantazhuar, pasi kryeministri është takuar me zv.presidentin e SHBA, Mike Pence në Podgoricë dhe ka zhvilluar një bisedë të gjatë telefonike me Sekretarin Amerikan të Shtetit, Rex Tillerson, ku kreu i DASH i dha “bekimin” e Uashingtonit për mandatin e dytë të Edi Ramës.
Blic, thekson se në fund të gushtit pritet një seri takimesh të rëndësishme në Bruksel për t’í dhënë shtysë dialogut shqiptaro-serb.
Presidenti i Serbisë, Aleksandër Vuçiç, pak javë më parë shpalli nisjen e një dialogu të madh për Kosovën. Nismë që deri tani është përprahur vetëm nga një lider shqiptar: kryeministri Edi Rama.
As presidenti Ilir Meta, e as lideri i opozitës Lulzim Basha nuk kanë dhënë një opinion të tyre për këtë qëndrim. /tesheshi.com/
