Shpërthen ambasadori amerikan në Tiranë, Donald Lu. Në kulmin e përplasjes mes mazhorancës, pikërisht për reformën në drejtësi, diplomati i Uashingtonit zyrtar ka drejtuar gishtin ndaj “parisë së kriminalizuar” dhe nuk ka kursyer askënd.
“Kush i trembet më shumë reformës në drejtësi?! Unë e di se kush. Ministrat e korruptuar, deputetë kriminelë, gjykatësit e paaftë dhe prokurorët që marrin paratë tuaja, por kurrë nuk ndjekin penalisht dikë. Këta persona duan të vazhdojnë të mbushin xhepat e tyre me paratë e popullit shqiptar. Mendoni për ta sa herë të dëgjoni që këta njerëz kritikojnë reformën në drejtësi.”
Deklarata e ambasadorit Lu është bërë pikërisht pas kritikave të LSI-së mbi draftin e përgatitur nga komisioni i ekspertëve, ku merr pjesë dhe një përfaqësues i Departamentit Amerikan të Drejtësisë. Këtë fakt e ka nënvizuar edhe diplomati i SHBA-së, i cili ka folur shkoqur e qartë se draftin e reformës e mbështet plotësisht qeveria amerikane.
“Për shkak se Shqipëria është një demokraci e mirëfilltë, duhet të ketë dialog të hapur e të sinqertë nëse këto propozime kushtetuese nga ekspertët tanë janë reformat e duhura për t’i trajtuar problemet serioze të Shqipërisë. Të gjitha partitë duhet të angazhohen në mënyrë konstruktive dhe t’u japin fund sulmeve politike.
Jam inkurajuar që javën e shkuar shtatë ekspertë të zgjedhur nga opozita u caktuan të punojnë në hartimin e ligjeve të reja. I nxis të gjithë, si shqiptarët ashtu dhe partnerët ndërkombëtarë, që të dëgjojmë me vëmendje diskutimet dhe sugjerimet konstruktive për këtë reformë. Mund t’ju siguroj se SHBA-të i mbështesin plotësisht propozimet aktuale.
Kjo është një reformë e rëndësishme, se për herë të parë do të ndërmarrë hapa për t’i eliminuar gjykatësit e prokurorët e korruptuar dhe të paaftë nga sistemi i drejtësisë.
Së fundmi, një gjykatës shqiptar tha kohët e fundit që druhej se propozimet kushtetuese do ta kompromentonin pavarësinë e gjyqësorit të Shqipërisë. Këtij i them se as edhe një shqiptar i vetëm nuk beson sot se sistemi i drejtësisë është i pavarur. Jo i pavarur prej kërkesës për ryshfet, jo i pavarur prej telefonimit të drejtësisë. Persona të fuqishëm u telefonojnë drejtpërdrejt gjyqtarëve për udhëzime. Si dhe jo i pavarur prej kërcënimeve kriminale të krimit të organizuar. Kjo reformë do t’i japë Shqipërisë mundësinë e vërtetë për ta bërë për herë të parë të pavarur sistemin e drejtësisë,” tha ambasadori Lu.
Ndërkaq, jo më pak e ashpër është treguar edhe ambasadorja e BE-së, Romana Vlahutin. Ajo ka
deklaruar se sistemi shqiptar është më i keqi në Europë, e se ka ardhur koha për ndryshime radikale.
“Ka ardhur koha për ndryshime radikale, dhe shpresoj që kjo reformë t’i sjellë. Përmbajtja e standardeve të BE-së nuk mund të negociohet. Eshtë e qartë që ekziston frika se kjo reformë mund të dështojë dhe të mos jetë e thellë për shkak të grupeve të interesit, të cilëve u shkon për shtat që kjo reformë të mos bëhet. Në emër të BE-së ju siguroj se të heqësh dorë nuk është pjesë e mentalitetit tonë. Qytetarët e Shqipërisë kanë vendosmërinë e tyre, se duan të jetojnë në një demokraci funksionale. Eshtë e drejta dhe përgjegjësia juaj t’ua bëni tërësisht të qartë atyre që ju i zgjidhni se kërkoni reformë gjithëpërfshirëse, të plotë e radikale,” tha diplomatja kroate e cila drejton zyrën e BE-së në Tiranë.
Kritikat e dy ambasadorëve u artikuluan në takimin me komisionin e posaçëm për reformën në drejtësi. /tesheshi.com/
