Ambasadori amerikan në Tiranë, Donald Lu ka folur për herë të parë për 613 kg kokainë që u kap në Durrës. Duke folur për mediat, Lu tha se i dyshuari kryesor si pronar i drogës është “peshk i madh”
“Nga çdo këndvështrim, Z. Cekaj është një ‘peshk i madh’. Kompania e tij importoi një ngarkesë bananesh që përmbante sasinë më të madhe të kokainës në tërë historinë e Shqipërisë.
Ai është hetuar më parë për trafikim kokaine nga prokurorët shqiptarë. Ne përgëzojmë punën e prokurorëve të Krimeve të Rënda që kërkuan urdhër arrestin për Z. Cekaj.
Shqipëria ka një histori të gjatë arrestimesh të ngjalave dhe injorimi të peshqve të mëdhenj. Kjo gjë merr fund sot. Ne i bëjmë thirrje partnerëve ndërkombëtarë të Shqipërisë që të gjejnë Z. Cekaj dhe ta dorëzojnë atë përpara drejtësisë”, tha Lu.
Pronari i drogës, një tropojan që thuhet se mban dhe mbiemrin Kuliçaj, është larguar drejt Gjermanisë pak para kapjes së sasisë së kokainës, ndërkohë që është arrestuar menaxhi i kompanisë së tij, “Arbri Garden” dhe një shofer. Mbetet të kuptohet se përse ambasadori Lu e ka pagëzuar Çekajn si “peshk të madh”, ndërkohë që është një emër i panjohur dhe nga bota e krimit. /tesheshi.com/
