Një raport i Kontrollit të Lartë të Shtetit ka nxjerrë në pah abuzimet e bëra nga drejtorët e lartë të administratës shtetërore me dhënien e pagave paralele për zv/ministrat, drejtorët apo dhe këshilltarët duke shkaktuar një hendek të madh në strukturën e pagave të administratës.
KLSH bën të ditur se disa zyrtarë të lartë të shtetit shqiptar marrin paga më të mëdha se presidenti i Republikës apo edhe Kryeministri. Sipas KLSH, si në qeverisjet e kaluara ashtu edhe në atë aktuale, gjithçka bëhet brenda mekanizmit të të ashtuquajturve borde.
KLSH bën me dije se abuzimi bëhet nga ente të fuqishme financiare që janë OSSH, KESH, OST apo edhe ente të tjera siç janë ndërmarrjet e ujësjellës-kanalizimeve në të gjitha qarqet e vendit.
“Në zbatimin e kuadrit rregullator ekzistues mbi krijimin përbërjen dhe shpërblimin e bordeve/komisioneve dhe Këshillave Mbikëqyrës, rezultoi një numër i konsiderueshëm punonjësish kryesisht të nivele të larta menaxheriale (Drejtorë Kabineti të Ministrave, Këshilltarë, Sekretarë të Përgjithshëm, Drejtorë të Përgjithshëm, Zëvendës Ministra, Drejtorë të Drejtorive etj) të angazhuar në kohë të pjesshme në cilësinë e kryetarëve/anëtarëve në borde, komisione, këshilla dhe organe të tjera kolegjiale. Kjo kategori punonjësish përveç pagës në ushtrim të funksioneve te tyre organike, përfiton të ardhura të tjera nga angazhimi në këto struktura kolegjiale, që shkojnë nga 24 struktura apo edhe më shumë për çdo punonjës, si dhe në disa raste edhe në struktura të sektorit privat, duke përfituar fonde të konsiderueshme në trajtën e shpërblimeve.
Konstatojmë se, në aspektin e performancës në punë dhe kontributit të këtyre punonjësve është realisht e pamundur si kohë fizike dhe jo vetëm kaq, angazhimi njëherazi si në institucionet ku janë të punësuar, ashtu edhe kontributi real në përbërje të bordeve, komisioneve, këshillave apo organeve të tjera kolegjiale. Impakti në këto raste është një pjesëmarrje formale, jo funksionale, jo kontribuese, pa efektivitet dhe i vetmi përfitim janë shpërblimet e konsiderueshme monetare vetjake, me pasojë abuzimin me fondet publike”, theksohet në njoftimin e KLSH-së.
Kontrolli i Lartë i Shtetit shton më tej se “nga shqyrtimi i dokumentacionit të vënë në dispozicion, rezultuan pagesa të konsiderueshme të anëtarëve të Këshillave Mbikëqyrës në shoqëritë anonime ndërkohë që këta punonjës nuk kanë marrë pjesë ose kanë marrë pjesë në një numër minimal mbledhjesh, duke sjellë për pasojë absurditete te tilla të pagesave kundrejt mungesës së kontributit dhe shpërblimeve për punë që nuk është kryer nga përfituesi, me impakt të drejtpërdrejte abuzim të fondeve publike”.
Kjo dosje e KLSH-së pritet të dërgohet edhe në prokurori ku do të ketë një hetim të hollësishëm për kategorinë e zyrtarëve të lartë për të parë batimin e ligjit dhe mënyrën e pagesës së sasive të mëdha të parave./tesheshi.com/
