Bombardimet e ashpra në Halep, në zonat e kontrolluara nga kryengritësit, kanë sjellë një situatë të padurueshme mes popullsisë civile dhe sipas UNICEF, që nga e premtja e javës së kaluar në lindje të qytetit janë vrarë të paktën 96 fëmijë dhe janë plagosur 223 të tjerë. “Fëmijët e Halepit janë të bllokuar në një makth të vërtetë”, deklaroi zëvendësshefi i agjencisë së OKB-së, Justin Forsyth. Sipas tij, nuk ka asnjë fjalë për të thënë, që të përshkruajë vuajtjet që po jetojnë këta fëmijë.
Sistemi sanitar në lindje të Halepit, shpjegon UNICEF, është në shkatërrim: kanë mbetur vetëm rreth 30 mjekë, shumë pak pajisje apo medikamente për urgjencat në kurimin e të plagosurve, ndërsa rritet përditë numri i rasteve me trauma të rënda.
Një mjek nga terreni ka thënë për UNICEF se fëmijët me pak mundësi mbijetese nga plagët, shpesh lihen në mëshirë të fatit, të vdesin për shkak se mjekimet janë të kufizuara. “Asgjë nuk mund të justifikojë një dhunë të tillë mbi fëmijët, – tregoi ai – është një mungesë e pakufishme për vlerën e jetës njerëzore. Vuajtjet dhe ndikimi i tyre mbi fëmijët janë me siguri, gjëja më e keqe që kemi parë”.
Ndërkohë, edhe pas ditëve të tëra bombardimesh, vijon përballja mes Moskës dhe Uashingtonit në lidhje me Halepin. Amerikanët kërkojnë armëpushim njëjavor, ndërsa rusët janë të gatshëm të japin garanci vetëm për një armëpushim 48-orësh, sipas tyre, “për të mos u dhënë mundësi terroristëve për t’u organizuar”.
Zyrtarët ushtarakë rusë janë të “gatshëm” të rinisin bisedimet në Gjenevë me homologët e tyre amerikanë për Sirinë, e kjo pavarësisht se sekretari amerikan i Shtetit, John Kerry kërcënoi me ndërprerjen e çdo lloj bashkëpunimi nëse nuk u jepet fund sulmeve siriano-ruse në Halep. Gatishmërinë ruse e deklaroi gjenerali Viktor Poznikhir, duke thënë se negociatorët e tij janë të gatshëm të fluturojnë në Gjenevë në kërkim të “një rruge të mundshme për normalizimin e situatës” së bashku me Shtetet e Bashkuara. Kjo përpjekje e re vjen pas armëpushimit të negociuar më herët e që zgjati vetëm një javë. Poznikhir, megjithatë, nuk i është referuar posaçërisht sekretarit Kerry.
Russia mbështet një armëpushim dyditor në Siri, e jo më shumë. “Kemi propozuar, në mënyrë të përsëritur, por Shtetet e Bashkuara mbeten të vendosura në kërkesën e tyre për shtatë ditë, që është një periudhë e mjaftueshme për rifurnizimin dhe rigrupimin e forcave. Një armëpushim prej shtatë ditësh është i papranueshëm për ne’, ka deklaruar zv.ministri i Jashtëm rus, Sergei Ryabkov duke denoncuar atë që e quan “tentative të vazhdueshme për të ndërprerë dialogun mes Moskës dhe Uashingtonit”.
Edhe më i drejtpërdrejtë shfaqet zëdhënësi i presidentit Putin, Dmitri Peskov: “Moska vijon operacionet e forcave ajrore për të mbështetur aktivitetin kundër-terrorist të forcave të armatosura siriane. Kjo, ka shtuar ai, është gjëja më e rëndësishme, pasi lufta kundër terroristëve vazhdon.
Përgatiti: Juli Prifti – /tesheshi.com/
