Katari do të lejojë tifozët me biletë që të blejnë birrë në ndeshjet e Kupës së Botës, por vetëm tre orë para fillimit dhe një orë pas bilbilit të fundit, pra jo gjatë ndeshjes.
Budweiser, sponsori kryesor i Kupës së Botës me të drejta ekskluzive për të shitur birrën në turne, do të shërbejë birrë brenda zonave të tifozëve të pajisur me bileta përreth çdo stadiumi, por jo në tribuna apo në stadium gjatë ndeshjes.
Kupa e Botës e këtij viti është e para që do të mbahet në një vend musliman me kontrolle të rrepta ndaj alkoolit.
“Do të ketë birrë kur të hapen dyert, që është tre orë para fillimit të lojës. Kushdo që dëshiron të pijë birrë do të jetë në gjendje. Dhe pastaj kur ai largohet nga stadiumi një orë pas bilbilit final”, citon Reuters një deklaratë nga një burim i afërt me organizimin e Kupës së Botës.
Përveç kësaj, Budëeiser do të lejohet të shërbejë birrë në një pjesë të zonës kryesore të tifozëve të FIFA-s në qendër të Dohas nga ora 18:30 deri në 01:00 çdo ditë të turneut 29-ditor, i cili fillon më 20 nëntor, tha burimi.
Në Kupat e Botës së mëparshme, birra derdhej në zonat e tifozëve gjatë gjithë ditës.
Një vendim se ku dhe kur birra do t’u shitet fansave tani është finalizuar, por çmimi që fansat do të paguajnë për birrën është ende duke u diskutuar, tha burimi.
Në fazën e grupeve të turneut janë planifikuar katër ndeshje çdo ditë, ku më e hershmja fillon në orën 13:00.
Për momentin, nuk është e qartë se si do ta zgjidhë Katari problemin e shitjes së birrës para orës 13:00. Uellsi dhe Irani luajnë të premten, më 25 nëntor, kur shumica e muslimanëve në Katar do të mblidhen në xhami për faljen e xhumasë.
Katari aktualisht kërkon që shumica e dyqaneve dhe restoranteve në vend të mbyllen gjatë lutjeve të së premtes.
Vizitorët nuk mund të sjellin alkool në Katar, edhe nëse e blejnë atë në aeroport, dhe nuk mund të blejnë alkool në dyqanin e vetëm të pijeve në vend, në periferi të Dohas. Aty mund të blejnë vetëm shtetasit e huaj me leje dhe kjo është për konsum shtëpiak.
Vizitorët mund të pinë në dhjetëra hotele dhe klube të licencuara, ku një litër birrë kushton 18 dollarë.
Budweiser do të shesë birrën e saj joalkoolike, Budweiser Zero, në stadiume dhe tribuna gjatë ndeshjeve dhe në zona të tjera për tifozët, shtoi një burim i paidentifikuar pranë organizimit të Kupës së Botës. /tesheshi.com/
