Delegacioni i Shqipërisë në asamblenë e Përgjithshme të OKB-së dhe aktivitetet e tjera të zhvilluara në kuadër të samitit, ka lobuar edhe për anëtarësimin e Kosovës në UNESCO, ashtu si ka bërë edhe vetë delegacioni i Kosovës.
“Shqipëria është propozuese e këtij anëtarësimi. Ky është një proces i vështirë, pasi do të ketë një votim të parë në këshillin e UNESCO-s dhe më pas në konferencën e përgjithshme, ku ka një shumicë më të madhe shtetesh”, deklaroi Bushati në një intervistë për Top Channel.
Ai shpjegoi se në Këshillin Ekzekutiv do të duhet një shumicë më shumë se gjysma e vendeve anëtare, ndërsa në në asamblenë e përgjithshme votimi është edhe më i komplikuar për shkak të nevojës së dy të tretave të votave.
“Në këtë proces ne po tentojmë të zgjerojmë kompasin tonë të veprimit edhe në vendet të cilat nuk e kanë njohur Kosovën, por që pritet që të kenë një qasje më fleksibël për sa i përket mundësisë së Kosovës për të qenë pjesë e UNESCO-s”, u shpreh Bushati.
Sipas tij, fushata e lobimit bazohet në idenë se anëtarësimi i Kosovës në UNESCO do të ishte një mesash i qartë për klimën pozitive që duhet të ekzistojë në rajonin tonë, për mbrojtjen më të mirë të trashëgimisë dhe vlerave kulturore. /tesheshi.com/
