Më shumë se 240 shkolla fillore dhe të mesme në Maqedoninë e Veriut morën e-mail mëngjesin e sotëm ku raportonin bomba, tha Aleksandar Janev, drejtor i Byrosë për Siguri Publike.
Lajmi vjen vetëm një ditë pasi kërcënimet me bombë paralizuan dhjetëra shkolla në Kroaci të enjten.
Për në Tetovë, policia tha se ka reaguar menjëherë pas këtyre raportimeve, ka biseduar me drejtorët, ka kontrolluar objektet e shkollave dhe ka konstatuar se të gjitha raportimet për mjete shpërthyese të vendosura janë të rreme.
“Ju e dini se ne kemi një protokoll dhe algoritëm të përshtatshëm për trajtimin e raporteve të tilla. Aty ku parametrat ishin pozitivë, pra në zonën e gjelbër, orët rifilluan dhe shumë shpejt. Aty ku plotësoheshin disa parametra në zona të tjera, u kryen kontrolle shtesë antiterroriste dhe kudo u konstatua se këto ishin raportime të rreme. “Siguria është stabile, nuk ka nevojë për panik nga qytetarët,” tha Janev, sipas mediave lokale.
Për shkak të kërcënimeve me bombë, mësimi është ndërprerë në disa shkolla fillore dhe të mesme në Shkup, Koçan, Shtip, Komanovë, Tetovë dhe qytete të tjera të Maqedonisë së Veriut.
Drejtori policor theksoi se MPB-ja është në kontakt me Europolin, Interpolin, si dhe me policinë e Kroacisë dhe Hungarisë, ku ditët e fundit ka pasur raportime për vendosjen e bombave nëpër shkolla.
“Ka pasur dhe do të ketë kërcënime dhe unë nuk do të ndaj informacione se nga erdhën tani për tani sepse mund të dëmtojë hetimin, por është e qartë se dikush para së gjithash kishte për qëllim të shkaktonte një sasi të caktuar paniku në mesin e qytetarëve”, shtoi Janev.
Kryeministri i Maqedonisë së Veriut, Hristijan Mickoski tha se është në kontakt të vazhdueshëm me ministrin e Brendshëm, i cili e informoi se të gjitha raportimet e deritanishme kanë qenë të rreme, pa përjashtim, dhe vlerësoi se këto janë “sulme hibride”.
“Këto janë sulmet hibride që do të ndodhin, nuk është diçka e papritur, ndaj duhet të përgatitemi”, tha Mickoski dhe informoi se grupi punues është duke mbajtur takim dhe se deri në fund të ditës udhëzimet do të arrijnë në shkolla dhe në anëtarët e MPB-së.
“Grupi punues është duke u takuar, gjegjësisht duke punuar në hartimin e një protokolli dhe deri në fund të ditës shkollat, si dhe drejtorët dhe anëtarët e MPB-së, do të marrin udhëzime se çfarë duhet bërë që mësimi në këto objekte të vazhdojë pa probleme”, tha kryeministri mqedonas. /tesheshi.com/
