Nuk është hera e parë që ndodh në Tiranë. Në televizion lajmet japin se në kryeqytet po ndodh e ashtuquajtura ditë pa makina.
Madje e japin edhe radiot e shumta që dëgjohen nëpër automjetet që heqin picirin në trafikun e bllokuar e të rënduar.
Ashtu ndodhi sot. Ndërkohë që kryetari i bashkisë Erjon Veliaj parakaloi në bulevardin “Dëshmorët e Kombit” së bashku me disa fëmijë me biçikleta, në rrugët e tjera smogu dhe dioksidi i karbonit përhapej si “n’karadak”.
Në kryeqytetet e tjera të botës, kur shpallet “Dita pa makina, në qytet nuk lejohet asnjë e tillë përveç transportit publik, taksive dhe autoambulancave. Këto ditë bëhen edhe teste të jetesës së metropolit pa nevojën e rrumpallës së makinave të panumërta.
Dhe pikërisht këto teste kanë dhënë rezultate për Londrën apo Stambollin, Parisin por edhe Berlinin.
Dhe në fakt, pjesa qëndrore e këtyre metropoleve funksionon më mirë me transport publik dhe taksi, sesa me makina që nuk ke ku i parkon dhe nuk ia leverdis të vërdallisesh.
Ndërsa “dita pa makina” në Tiranë është vetëm sa për të dalë në televizor.
Megjithatë, kryetari i Bashkisë së Tiranës, Erion Veliaj deklaroi se “Të martën, më 22, do të orgabizojmë 22 aktivitete deri në orën 22:00. Kjo do të thotë që Tirana nga ora 06:00 deri në orën 22:00 do të jetë totalisht e bllokuar brenda unazës së vogël.
Qyteti do të pushtohet nga ata që duan të ecin, dhe duan të pedalojnë. 364 ditë në vit qytetin e pushtojnë makinat, një ditë do ta pushtojnë njerëzit”.
Veliaj tha se Tirana nuk është ende gati për pedalim, pasi kërkohen investime në korsi të dedikuara për biçikletat, por duhet të kemi hapësira. /tesheshi.com/
