Presidenti francez Emmanuel Macron pësoi një humbje të rëndë në zgjedhjet evropiane të dielën, më 9 qershor, ndaj udhëheqëses së ekstremit të djathtë Marine Le Pen, fitorja e së cilës rrit shanset e saj në zgjedhjet presidenciale të 2027-ës.
Menjëherë pas këtyre rezultateve, Macron njoftoi se po shpërndante parlamentin dhe po bënte thirrje për zgjedhje të reja. Ai kërkoi që zgjedhjet parlamentare të mbahen më 30 qershor dhe 7 korrik.
Partia e Le Pen po fiton rreth 32 për qind të votave, dhjetë më shumë se në zgjedhjet e mëparshme evropiane në 2019 dhe 17 për qind më shumë se partia e Macron, sipas sondazheve të daljes. Socialistët marrin 14 për qind.
Le Pen dhe kandidati i saj kryesor, 28-vjeçari gjithnjë e më popullor Jordan Bardella, i shohin zgjedhjet evropiane si një referendum mbi sundimin e Macron, i cili është dëmtuar nga problemet e emigracionit dhe krimit dhe një krizë inflacioni dyvjeçare.
Një fitore e Le Pen do të dobësojë qeverisjen e Macron tre vjet para përfundimit të mandatit të tij të dytë dhe të fundit dhe mund të shkaktojë zgjedhje të parakohshme kombëtare. Të konvertuar në mandate, Tubimi Kombëtar i Marine Le Pen merr 31, Rilindja e Macron 14 dhe socialistët 13. /tesheshi.com/
