Nga Blendi Gashi
Vendimi i Kryesisë së Kuvendit të Kosovës për të përjashtuar opozitën nga seancat plenare, ka ngritur edhe më shumë tensionet në vend.
Partitë opozitare thotë se me akte të tilla po mbyetet demokracia në vend dhe po vendoset sistemi policor.
Ndwrsa analistët përjashtimin e të zgjedhurve të popullit nga seancat e quajnë antidemokratike dhe metoda diktatoriale e fashiste të pushtetit.
Lëvizja Vetëvendosje thotë se suspendimi i opozitës është në kundërshtim edhe me rregulloren e Kuvendit edhe me Kushtetutën.
“Demokracia përfundimisht u minua, brenda institucionit më të lartë të këtij vendi“, thekson VV.
Partia e Ramush Haradinajt, AAK, vlerëson se veprimet e sotshme të pushtetit janë shkelje e rëndë e demokracisë dhe vendosje e sistemit policor.
“Përjashtimi i opozitës nga Kuvendi, burgosja në masë e deputetëve, dhunimi i tyre nga policia, invadimi dhe demolimi i zyrave të partive opozitare, e masa të tjera të ngjashme, janë të papara për botën demokratike dhe këto nuk do të mund të kalojnë pa u ndëshkuar”, thuhet në reagimin e AAK-së.
Deputeti i VV-së Ilir Deda, i cili nuk është përjashtuar nga seancat ka thënë se suspendime të tilla të opozitës mund të ndodhin veç në vendet si Rusia.
“Suspendimi i opozitës është suspendim i demokracisë. Suspendim të tillë nuk ka as në Rusi, Venezuela apo Bjellorusi. Akti i sotëm e shënon fundin e Qeverisë Mustafa-Thaçi. Koalicioni PDK-LDK përbën regjimin më anti-demokratik në Kosovë në këto 16 vite liri. Natyrisht që nuk do të marr pjesë në punimet e Kuvendit pa kolegët e opozitës. Ndryshimi i vonuar në Kosovë do të vijë mē shpejtë se sa që kemi menduar”, ka deklaruar Deda.
Përjashtimi i opozitës, metoda diktatoriale dhe fashiste
Analisti, Faik Krasniqi, thotë se kërkesa e dy partive në pushtet PDK-LDK, për të përjashtuar për kohë të gjatë opozitën nga seancat e Kuvendit, është antidemokratike dhe metoda diktatoriale e fashiste, sepse ata janë përfaqësues të zgjedhur të popullit.
“Kjo nuk guxon kurrsesi të ndodh. Në rast se merret një vendim nga ky pushtet mafioz, atëherë përgjegjësinë për çfarëdo që të ndodh, do ta mbaj kjo Qeveri që përpos kapjes së shtetit, korrupsionit dhe krimit të organizuar, po duan ta jetësojnë edhe zhbërjen e shtetit dhe tkurrjen e saj, me nënshkrimin e atyre dy marrëveshjeve”, ka deklaruar Krasniqi për tesheshi.com.
Njohësi i rrethanave politike, Blerim Burjani, thotë se situata e krijuar është ndarje e funksionimit të shtetit dhe demokracisë.
“Kjo është situatë delikate dhe baza ligjore nuk është e saktë. Prandaj, rruga më e drejt do të ishte të pajtohet opozita me situatën dhe ta ndërrojë strategjinë, ose kjo opozitë të bojkotoj Kuvendin”, ka deklaruar Burjani, për tesheshi.com.
Analisti Donik Sallova, thotë se pas situatës së krijuar duhet të shikohet mundësia që të shpërbëhet Parlamenti.
“Një Kuvend i cili mblidhet mbi baza selektive (përjashtuese) nuk është demokratik, prandaj duhet te shperbehet nga Presidentja, si garantja e kushtetutshmerise se institucioneve te Republikes!”, ka deklaruar Sallova.
Ndryshe, ka qenë shefi i GP të PDK-së Adem Grabovci dhe shefi i GP të LDK-së Ismet Beqiri të cilët kanë kërkuar që tri partitë opozitare VV, AAK e NISMA të përjashtohen për një kohë të gjatë nga Kuvendi.
Mirëpo, me këtë kërkesë aspak nuk janë pajtuar nënkryetarët e Kuvendit, duke thënë se nuk mund të përjashtohet opozita për kohë të gjatë pasi një gjë të tillë nuk e parasheh as Rregullorja e Kuvendit.
/tesheshi.com/
