Sikurse gjatë qeverisjes së kaluar, edhe tani, për qeveritarët shtimi i njohjeve është prioritet i prioriteteve. Por, kjo me gjasë ka mbetur vetëm në letër. Vitin e kaluar vendin e kanë njohur vetëm tre shtete, ndërsa sivjet asnjë!
Shtimi i njohjeve ndërkombëtare për shtetin e Kosovës, duket se është prioritet i Qeverisë së Kosovës. Të paktën, kështu shkruan në një program të ekzekutivit kosovar.
“Qeveria e Kosovës do të mbetet fuqimisht e angazhuar për të lobuar për njohje ndërkombëtare nga ana e shteteve anëtare të OKB-së, me qëllim të forcimit të pozicionit ndërkombëtar të Kosovës dhe për të vendosur marrëdhënie diplomatike me shumicën e shteteve anëtare të OKB-së”, thuhet në këtë program, një kopje të së cilit e ka siguruar portali TeSheshi.
Në këtë dokument thuhet se Kosova tashmë e ka arritur numrin prej 108 njohjeve, ndërsa në këtë mënyrë ka arritur qëllimin për të pasur më shumë se 100 vende që njohin Kosovën.
“Ministria e Punëve të Jashtme do të synojë gjatë mandatit të ardhshëm të arrijë njohjen e Kosovën si shtet të pavarur dhe sovran nga 2/3 e shteteve anëtare të OKB-së. Arritja e këtij synimi do të fuqizojë Kosovën si një anëtar i plotë dhe i barabartë i bashkësisë ndërkombëtare dhe do të jetë një kontribut i rëndësishëm për paqen, stabilitetin dhe sigurinë e rajonit. Gjithashtu, një shtysë e fuqishme drejt pranimit të saj formal si shtet anëtar i Kombeve të Bashkuara”, shkruan më tutje në program.
Përveç tjerash, siç thuhet e rëndësishme për Kosovën do të mbesin njohjet nga nga Rusia, Kina, Brazili, India dhe Afrika e Jugut, si vende më ndikim në arenën ndërkombëtare dhe në rajonet e tyre përkatëse.
“Qeveria vlerëson se pozicioni i tyre i pafavorshëm ka pësuar ndryshim të theksuar. Për më tepër, do të vazhdohet të punohet me fuqitë e tjera rajonale, si: Indonezia, Nigeria, Meksika, Kenia, Kili, Paraguai, Bangladeshi dhe shtete të tjera me ndikim në rajone të ndryshme”, theksohet në program.
Ekzekutivi kosovar pretendon se me rritjen e numrit të njohjeve, prioritet vazhdon të mbetet vendosja e marrëdhënieve diplomatike me shtetet që e kanë njohur Kosovën si shtet të pavarur dhe sovran, ndërsa konstatohet se marrëdhëniet diplomatike fuqizojnë njohjen e Kosovës nga një shtet dhe forcojnë pozitën si një anëtar i plotë i bashkësisë ndërkombëtare.
Por, pavarësisht nga ky program, njohjet ndërkombëtare për shtetin më të ri në Ballkan janë pakësuar jashtëzakonisht shumë.
Përderisa në vitin e parë kalendarik të shpalljes së pavarësisë, vendi ishte njohur nga pesëdhjetetre shtete, gjatë vitit të fundit kalendarik, Kosovën e kanë njohur vetëm tre vende, ndërsa sivjet nuk është arritur të shtohet asnjë njohje.
Këto të dhëna janë shqetësuese për deputetët e partive opozitare.
Puhie Demaku, deputete e Lëvizjes Vetëvendosje dhe anëtare e Komisionit Parlamentar për Politikë të Jashtme, thotë se realiteti është i atillë që Kosova i ka punët keq për brenda saj, prandaj, është e kotë të shpresohet se do të kemi njohje, siç thotë ajo, në ritmin dhe cilësinë që do të duhej ta kishim.
“Imazhin e Kosovës e kanë dëmtuar pikërisht këta që po kërkojnë njohje. Mjafton një kërkim në google.com për të parë se me çfarë titujsh lidhen emrat e udhëheqësve të politikës së jashtme. Kështu nuk është befasi që ka rënë numri dhe as që kemi ngecje në procesin e njohjeve”, thotë ajo.
Demaku theksin se njohja e një shteti nga shteti tjetër, nënkupton që ai që të njeh të konsideron të denjë për partner, prandaj, thotë ajo, është e dhimbshme se çfarë po ndodhë me këtë proces./TeSheshi/
