Policia gjermane njoftoi për zjarrvënie të qëllimshme në palestrën e një shkolle që shërbente si strehë e përkohshme për azilkërkuesit. Incidenti po hetohet në këtë pistë, ndërsa besohet se zjarri në Nauen, në perëndim të Berlinit, është vënë me qëllim. Në incident, nuk ka të plagosur.
Së fundmi, në zonë ka pasur protesta të aktivistëve të së djathtës ekstreme.
Kancelarja gjermane, Angela Merkel më herët, dënoi protestat e dhunshme në një strehë azilantësh në qytetin lindor, Heidenau në afërsi të Dresdenit ku nga përleshjet u plagosën me dhjetëra policë.
Merkel e përshkroi sjelljen e aktivistëve të krahut të djathtë në këtë qytet si të turpshme dhe tha se do të vizitojë personalisht qytetin.
Gjermania përballet me një fluks prej 800 mijë personash që pritet të kërkojnë azil deri në fund të vitit. Korrespondentët thonë se pjesa më e madhe e gjermanëve mirëpresin refugjatët, por ka një pakicë që ka qenë e zëshme në kundërshtinë e saj, duke thirrur protesta në vijimësi. /tesheshi.com/
