Nga Blendi Gashi
Për dallim nga vitet e kaluara ku drejtuesit e shtetit dhe partive kosovare janë përplasur ashpër mes vete në Kuvendin e Kosovës, por jo vetëm, lidhur me mënyrën si ka ecur dialogu me Serbinë, me ç’rast ka pasur edhe akuza për shitje të shtetit, një debat i qetë është mbajtur të enjten në konferencën “Skenarët e ‘Finales së Madhe’ ndërmjet Kosovës dhe Serbisë”.
Për herë të parë, presidenti Hashim Thaçi e kryevetëvendosësi Albin Kurti janë ulur në një tryezë, të cilët edhe pse nuk i shtrinë dorën njëri-tjetrit, nuk bën akuza të rënda mes vete, por që shprehën qëndrimet e tyre tashmë të njohura “pro et contra” rreth rrugëtimit të dialogut.
Presidenti Thaçi foli për një marrëveshje historike, por nuk tregoi për çfarë konrektisht e ka fjalën.
“Jam i bindur se ka ardhur koha për marrëveshjen madhe politike dhe historike në mes Kosovës dhe Serbisë. Nuk ka dhe nuk mund të ketë status kuotë apo gjendje të raporteve të ngrira në mes Kosovës dhe Serbisë. Për ne në Kosovë kjo marrëveshje ka peshën e njohjes reciproke dhe normalizimin e plotë të marrëdhënieve me Serbinë, kjo marrëveshje pastaj në terminologjinë e saj precize dhe të qartë do të duhej të mundësonte që Kosova të bëhej pjesë e OKB-së dhe BE-së”, deklaroi Thaçi.
“I graham vet punëve…”
I ashpër me Brukselin është treguar kryeministri Ramush Haradinaj për veprimet e tyre karshi Kosovës, duke thënë se duhet kërkojë ndihmë nëse nuk ka kapacitet për ta përmbyllur çështjen e dialogut.
“Sa u përket marrëveshjeve, disa janë zbatu, disa jo, siç është ajo për energjinë. Këtu shihet dobësia e Brukselit, lejon me ndodhë plot veprime të jashtëligjshme. Nëse s’ka kapacitet lypni, ndihmë ose, nëse prapë s’doni me lyp ndihmë, le të na tregon ne dhe ne shkojmë në drejtimin tonë si në të kalumën i kemi grah punëve tona”, tha Haradinaj, duke lënë enigma se ç’drejtim mund të marrë kokë me vete dhe pa konsultim me BE-në.
“Prioritet bashkimi i Mitrovicës, jo ulësja në OKB”
Kryevetëvendosësi Albin Kurti, për dallim nga Thaçi u shpreh se dialogu ka sjell shumë pak përfitime, ndërsa shtoi se ky dialog duhet të ketë mbikëqyrje parlamentare gjë që ka munguar deri më tani.
Sipas Kurtit, Kosova duket ta kuptojë se çfarë dëshiron Serbia nga ne dhe më pas vendi të veprojë mençur.
“Prioritet duhet të jetë bashkimi i Mitrovicës, më falni por jo ulësja e OKB-së. Nuk jam kundër ulëses në OKB, por bashkimin e Mitrovicës nuk mund ta krahasojmë me ulësen në OKB. Kush mendon se mund të përmbyll një proces dialogu pa pëermendjen e Mitrovicës vetëm e mashtron veten”, tha Kurti.
Mendim ndryshe nga Kurti shprehu ambasadori amerikan, Greig Delawie i cili tha se dialogu ka sjell përfitime për Kosovën dhe se bisedimet janë e vetmja mundësi për të arritur zgjidhje mes Kosovës dhe Serbisë.
“Nuk ka ndonjë alternativë përveç negociatave dhe kompromisit mes të dyja vendeve. SHBA mbështet aspiratat e Kosovës e Serbisë për t’u bashkuar në Bashkimin Europian”, theksoi Delawie.
Kurse nënkryetari i LDK-së, Lutfi Haziri, ka thënë se dialogu nuk mund të vazhdohet me dialog pa kufij por duhet institucionet duhet ta kenë një agjendë të qartë politike.
Ai ka thënë se në këtë proces duhet të ketë transparencë dhe Kuvendi i Kosovës duhet të informohet, sipas tij për t’i eliminuar agjendat e dyshimta.
Por Thaçi ju kundërpërgjigj Kurtit e Hazirit duke thënë dialogu ka qenë tejet transparent, ndërsa tha se formimit të Ekipit të Unitetit për bisedimet me Serbinë duhet t’i paraprijë miratimi i një rezolute në Kuvend. /tesheshi.com/
