Lëvizja e afërt me VMRO-DPMNE-në – “Tvrdokorni”, që më 27 prill hyri dhunshëm në Kuvend, rrahu deputetë dhe dogji objektin, paralajmëroi se sot, më 2 shtator në orën 17:00 do të mbajnë një protestë me moton “Marsh për abolim të patriotëve – marsh për zgjimin e popullit maqedonas”, shkruajnë në faqen e tyre të Facebook-ut.
Sipas paralajmërimeve, protesta do të nisë nga Katedralja Ortodokse e Shkupit, do të vazhdojë drejt godinës së qeverisë, për të përfunduar te ajo e Kuvendit.
Sipas paralajmërimit të bërë, objekt i protestës do të jetë edhe dygjuhësia në Maqedoni.
“Ejani të gjithë t’u kundërvihemi padrejtësive ndaj popullit maqedonas, të cilët po kthehen dhjetëra vite mbrapa.
Të gjithë t’i kundërvihemi dygjuhësisë, t’i kundërvihemi përpjekjes që të vendosen emigrantë, hajde t’u tregojmë politikanëve se populli është ai që vendos për të ardhmen e tij.
Populli nuk do të qëndrojë i qetë ndërsa dikush përpiqet t’i marrë atë çfarë i ka mbetur, t’u tregojmë se ne kemi krenari. i ftojmë të gjithë patriotët të marrin pjesë”, thuhet në thirrjen e tyre. /tesheshi.com/
