Avionët e ushtrisë siriane kanë kryer më shumë se 150 sulme ajrore në lindje të Halepit gjatë 24 orëve të fundit, duke vrarë të paktën 90 persona.
Sulmet, pjesë e një ofensive të re të regjimit sirian, i kanë shkatërruar strukturat e shërbimit të emergjencës, si dhe strehimoret nëntokësore, të përdorura nga civilët për t’u fshehur nga bombardimet.
Së paku 30 lagje janë shënjestruar gjatë sulmeve, njofton Al Jazeera, duke shtuar se bombardimet i kanë penguar punonjësit e shpëtimit që t’u vijnë në ndihmë civilëve.
Tri qendra të grupit vullnetar për shpëtim, të quajtur ndryshe edhe Helmetat e Bardha, janë goditur gjithashtu gjatë sulmeve. Pesë makina të Helmetave të Bardha janë shkatërruar, përfshirë një autoambulancë.
“Qendra jonë ka është goditur drejtpërdrejt nga sulmet,” kanë njoftuar Helmetat e Bardha.
Kjo është dita e dytë me radhë e sulmeve të tilla të ashpra, që kanë zgjatur përgjatë tërë natës, deri në mëngjes.
“Po e ndjejmë tokën të dridhet nën këmbët tona. Halepi po digjet,” është shprehur një aktivist në zonën e kontrolluar nga kryengritësit.
Ushtria siriane, e cila është mbështetur edhe nga forcat ajrore ruse, ka pohuar të enjten nisjen e një operacion të ri kundër pjesës lindore të Halepit, që gjendet nën kontrollin e kryengritësve e ku banojnë 250.000 njerëz.
Ofensiva e re e forcave qeveritare siriane vjen menjëherë pas dështimit të fuqive ndërkombëtare në Nju Jork për ta përtërirë armëpushimin në Siri. /tesheshi.com/
