Një numër i madh emigrantësh të nisur nga brigjet libiane besohet të kenë humbur jetën pasi anija e peshkimit me të cilën po lundronin u përmbys.
Burime të Kombeve të Bashkuara njoftojnë se 400 emigrantë janë shpëtuar gjer tani, e 25 janë konfirmuar si të vdekur, nga rreth 600 që kanë qenë në anije.
Peshkatorja mendohet të jetë përmbysur kur pranë saj është afruar anija irlandeze LE Niamh, e cila gjendet në atë hapësirë si pjesë e operacioneve të BE-së për të parandaluar emigracionin përmes detit. Le Niamh është afruar pas sinjalit për ndihmë të lëshuar nga mjeti lundrues me emigrantë.
Operacioni i shpëtimit po kryhet në kushte jo të mira të motit, ndërsa në vendin e ngjarjes janë afruar dhe anije të rojës bregdetare italiane.
Ky është incidenti më i fundit në Mesdhe i përmbysjes së anijeve të mbushura me emigrantë që vënë jetën në rrezik për t’i ikur realitetit të tyre katastrofik dhe për të shkelur në tokën europiane, në kërkim të një jete më të mirë.
Mbi 2000 emigrantë kanë humbur jetën në këta shtatë muaj të këtij viti, në tentativën e tyre të dështuar për të kaluar Mesdheun, e 188.000 të tjerë janë shpëtuar.
Jetët e humbura në vitin e shkuar qenë 3.279, e 1607 emigrantë janë mbytur në të njëjtën periudhë kohore, pra, nga janari gjer në fillim të gushtit të 2014-ës.
Mesdheu është kthyer në makthin e mijëra të pashpresëve që lënë vendet e tyre të zhytura në varfëri e në konflikte, por njëkohësisht është parë dhe si e vetmja mundësi për të ndryshuar jetën. /tesheshi.com/
