Armenia dhe Azerbajxhani akuzuan njëri-tjetrin të hënën për shkeljen e një armëpushimi të ndërmjetësuar nga SH.B.A. në luftimet mbi enklavën malore Nago-Karabak, duke vënë në dyshim perspektivat e ndërmarrjes më të fundit ndërkombëtare për t’i dhënë fund një muaji konflikti.
Armëpushimi i tretë në pak më shumë se dy javë hyri në fuqi në 8 të mëngjesit me kohën lokale (0400 GMT). Brenda pak minutash, Ministria e Mbrojtjes e Azerbajxhanit njoftoi se forcat armene kishin granatuar fshatra në rajonet Terter dhe Lachin.
Ministria e Mbrojtjes së Nago-Karabakut e mohoi atë dhe tha se forcat azerbajxhanase filluan një sulm me raketa në pozicionet ushtarake armene në anën verilindore në vijën e kontaktit. Ministria armene e Mbrojtjes njoftoi se pala azere shkeli armëpushimin rreth orës 9.10 të mëngjesit me kohën lokale, raporton Reuters.
Luftimet e fundit në Nago-Karabak, një pjesë malore e Azerbajxhanit e banuar dhe e kontrolluar nga armenët etnikë, shpërthyen në 27 shtator dhe janë më të ashprat në Kaukazin e Jugut që nga vitet 1990. Dy armëpushime të ndërmjetësuara nga Rusia kanë dështuar.
Fuqitë botërore duan të parandalojnë një luftë më të gjerë që mund të zvarritë Turqinë, e cila ka shprehur mbështetje të fortë për Azerbajxhanin, dhe Rusinë, e cila ka një pakt mbrojtje me Armeninë. Konflikti gjithashtu ka tensionuar marrëdhëniet midis Ankarasë dhe aleatëve të saj në NATO, shkruan agjencia britanike e lajmeve.
Armëpushimi i fundit u ra dakord të dielën pas bisedimeve të ndara në Uashington midis Sekretarit të Shtetit Mike Pompeo dhe ministrave të jashtëm të Armenisë dhe Azerbajxhanit. /tesheshi.com/
