Kryeministri Rama kreu një vizitë zyrtare në Egjipt, ku veç tre marrëveshjeve të nënshkruara, premtoi dhe një linjë fluturimesh direkte Tiranë – Kajro.
“Marr me vete premtimin për të vendosur linjën e drejtpërdrejtë Kairo-Tiranë dhe anasjelltas. Nuk e di nga pala egjiptiane, por nga pala shqiptare ju siguroj që avionët nuk do jenë kurrë bosh dhe kjo linjë ajrore nuk do jetë barrë për kompaninë, krejt e kundërta, do të ndihmojë shumë shqiptarë që dëshirojnë të vijnë, dëshirojnë të vizitojnë, duan të bëjnë pushimet këtu, për të ardhur në këtë tokë e për të kuptuar që njëherë e një kohë, ishte si dera e pasme e atdheut tonë edhe pse asaj kohe largësia ishte shumë më e madhe”, tha Rama në një konferencë shtypi me homologun e tij egjiptian, Moustafa Madbouly.
Kështu, pas Saudisë dhe Emirateve, Egjipti do jetë vendi i tretë arab me linjë direkte me Shqipërinë, të gjitha të vemdosura vitet e fundit.
Ndërsa tre marrëveshjet e nënshkruara ishin:
- Memorandum mirëkuptimi mbi bashkëpunimin në fushën e muzeve ndërmjet Muzeut Historik Kombëtar të Republikës së Shqipërisë dhe Këshilli i lartë i Antikiteteve i Republikës Arabe të Egjiptit
- Program ekzekutiv mbi bashkëpunimin kulturor midis Ministrisë së Kulturës së Republikës së Shqipërisë dhe Ministrisë së Kulturës së Republikës Arabe të Egjiptit
- Protokoll bashkëpunimi ndërmjet panairit të librit në Tiranë dhe Organizatës së përgjithshme të librit egjiptian.
Pas firmosjes së tyre, kryeministri egjiptian tha se “diskutuam mënyra për të forcuar marrëdhëniet tona, në turizëm, energji, tregti dhe kulturë”.
“Kjo vizitë një pikë kthese të bashkëpunimit mes dy vendeve. Egjipti pret të forcojë marrëdhëniet me Shqipëri”, tha Moustafa Madbouly. /tesheshi.com/
