Certifikatat dixhitale jeshile, të ashtuquajturat Pasaportat COVID do të përdoren derisa Organizata Botërore e Shëndetësisë (OBSH) të deklarojë fundin e pandemisë COVID-19 dhe linjat ajrore do të jenë në gjendje t’i përdorin ato për të hipur pasagjerë në bord, tha Komisioneri i Drejtësisë i Komisionit Evropian Didier Reynders.
“Ne duam të sigurojmë që qytetarët dhe Shtetet Anëtare të kenë një mjet që u jep atyre një farë besimi, tek i cili autoritetet kompetente mund të mbështeten për të lehtësuar lirinë e lëvizjes së personave”, tha Reynders në Komitetin e Lirive Civile të Parlamentit Evropian.
Reynders paraqiti një propozim për anëtarët e komitetit që Komisioni publikoi në mes të muajit të kaluar. Certifikatat dixhitale të gjelbërta duhet të lehtësojnë lëvizjen e sigurt të lirë të njerëzve brenda BE-së gjatë pandemisë COVID-19.
Një pasaportë COVID do të jetë prova se një person është vaksinuar, ka marrë një rezultat negativ të testit ose është shëruar nga sëmundja.
Reynders tha se ato çertifikata mund të përdoren gjithashtu për të hipur në aeroplan. Shumë kompani tani po kërkojnë një test negative për të hipur në aeroplan.
Komisioneri tha se qëllimi është që certifikatat të përdoren para fundit të qershorit. Parlamenti Evropian duhet të votojë rregulloren në seancën e tij plenare nga 7 deri më 10 qershor. /tesheshi.com/
