Greqia dhe Irani kanë konfirmuar lejen e dhënë për Moskën që ajo të përdorë hapësirën e tyre ajrore për të dërguar furnizime në Siri.
Agjencia e lajmeve Interfax, duke cituar një zyrtar të ambasadës ruse, në Teheran, tha se janë plotësuar të gjitha kërkesat e Moskës, për të dërguar ndihma humanitare në Siri.
Ambasada e Rusisë në Athinë, sipas një burimi të cituar nga Evropa e Lirë, deklaroi se edhe Greqia i lejon Rusisë, përdorimin e hapësirës ajrore, për qëllime humanitare, në Siri.
Greqia, madje, ka deklaruar se i është kërkuar nga SHBA të mos lejojë përdorimin e hapësirës ajrore greke nga Moska, pasi kjo e fundit mund ta përdorë atë për të furnizuar regjimin e al Assad.
Të gjitha këto zhvillime janë komentuar nga sekretari i Përgjithshëm i NATO-s, Jens Stoltenberg I cili shprehu shqetësimin e aleancës për mundësinë e transportimit nga Moska të ndihmave ushtarake në Siri.
“Jam i shqetësuar nga informacionet se Rusia mund të ketë zhvendosur personel ushtarak dhe forca ajrore në Siri”, tha Stoltenberg . /tesheshi.com/
