Në Montekarlo ka sërish garë, por kësaj radhe në pistë nuk kanë zbritur makinat e Formula 1, por Interi dhe Milani, të cilat i kanë hapur luftë njëra-tjetrës për të siguruar shërbimet e mesfushorit të Monakos, Xhefri Kondogbia.
Kronologjia e ditës – Dita e djeshme ishte e mbushur plot me surpriza dhe “bërryla” mes dy ekipeve milaneze në garë për lojtarin.
Pasi takoi drejtuesit e Monakos dhe familjen e Kondogbias të enjten, administratori i Milanit, Adriano Galiani, u kthye dje në Milano, në pritje të përgjigjes përfundimtare të lojtarit.
Mirëpo, kur dukej se gjithçka po shkonte në drejtimin e duhur për kuqezinjtë, në skenë u rishfaq sërish Interi, i cili, me anë të trajnerit Roberto Mançini, i telefonoi francezit në mesditë, duke provuar që t’i ndryshonte drejtimin e selisë në Milano.
Presidenti i zikaltërve, Erik Tohir, flitet se arriti t’i ofronte Monakos 27 milionë euro, por oferta e kuqezinjve ishte më joshëse dhe në atë pikë gjithçka do të varej nga vullneti i 22-vjeçarit. Nuk vonoi shumë dhe, pas tentativave të Interit, erdhi edhe kundërpërgjigjja e Milanit.
Adriano Galiani u nis sërish drejt Montekarlos, kësaj radhe për t’i dhënë fund telenovelës “Kondogbia”. Të njëjtën gjë bëri edhe Interi, i cili dërgoi në Francë Piero Auzilion. Si fillim, Galiani u takua me drejtuesit e Monakos dhe, pas darkës, u shpreh:
“Nuk jam as optimist dhe as pesimist. Kam bërë shumë tratativa gjatë karrierës sime dhe kurrë nuk e kam humbur kontrollin. Interi? Mund t’ju them se është edhe Juventusi në këtë garë që sa vjen dhe më ngjason me trofeun ‘TIM’. Të shohim, unë nga Montekarlo nuk largohem”.
Pasi Galiani futi në “valle” Juventusin, drejtuesit e klubit bardhezi kanë reaguar menjëherë duke përgënjeshtruar se janë të interesuar për lojtarin. Sakaq, sipas mediave italiane, Kondogbia flitet se ka marrë edhe disa orë kohë për të vendosur dhe sot mund t’u kthejë një përgjigje përfundimtare dy milanezeve. /tesheshi.com/
