Besnik Bare, deputet i PS-së në dy mandate, i njohur më së shumti për trajtimin e çështjeve të mjedisit, vendosi të vetëlargohet nga politika, duke u tërhequr fillimisht nga aplikimi për të qenë sërish deputet.
“Nisur nga afrimet e reja në PS, e për t’u krijuar hapësira atyre, kam vendosur të mos plotësoj formularin për kandidimin si deputet.
Shpresoj ta kem justifikuar besimin që më është dhënë në kryerjen e kësaj detyre e mos të kem zhgënjyer njeri.
Jam përpjekur, me mundësitë e mija modeste, të jem pjesë e zërit të shqetësimeve dhe zgjidhjes së problemeve të komunitetit të zonave që kam mbuluar”, shkruar Bare në një mesazh në rrjete.
Ai e gjen me vend të japë dhe një këshillë morale, teksa shkruan se “sot ka mjaft të rinj të përfshirë apo që aspirojnë të përfshihen në politikë”.
Do uroja që tek ta të kultivohen tre elementët që përmenda: ndershmëria, idealizmi dhe profesionalizmi.
Rendja pas fitimit, pasurimit abuziv është tipar kompromentues i shoqërisë tonë.
Shoqëria jonë, partitë politike duhet të ngrenë mekanizma si të kultivojnë profesionalizmin, idealizmin dhe ndershmërinë tek të rinjtë në përgjithësi dhe ata të përfshirë në politikë, në veҫanti. Sigurisht, rol në këtë drejtim luan edhe një drejtësi e konsoliduar”, shprehet Bare. /tesheshi.com/
