Nga Blendi Gashi
Kuvendi i Kosovës po bën gati një muaj që nuk ka arritur të mbajë një seancë të plotë plenare. Dhe fajtorë për një gjë të tillë janë deputetët e mazhorancës të cilët nuk po qëndrojnë aty.
Shumica prej tyre, pasi vendosin firmën, atë që jua mundëson nënshkrimin e “ditës së punës”, ose e përkthyer ndryshe pagesës, më pas ikin dhe nuk qëndrojnë ulur deri në fund në ndenjëset e tyre për të bërë atë për çka janë votuar në shërbim të vendit, njerëzve.
Për mungesë kuorumi u ndërpre edhe seanca e fundit. Mungesa e deputetëve të mazhorancës nervozoi jo pak shefin e grupit parlamentarë të PDK-së, Adem Grabovci.
“Kemi tre javë që nuk kemi pas seancës, e kemi obligim dhe përgjegjësi të marrim pjesë e të mundësojmë funksionim normal të Parlamentit të Kosovës. Duhet të bëjmë një zgjidhje. Të gjejmë një formë që deputetët që nuk marrin pjesë në votim, mos të kenë të drejtë të marrin mëditjet”, tha Grabovci.
Në mungesë të kuorumit nuk po mbahen edhe komisionet parlamentare. Fjala vjen, komisioni parlamentar për zhvillim ekonomik nuk mbajti mbledhjen e caktuar pasi munguan deputetët Sala Berisha- Shala, Fatmir Rexhepi, Duda Balje.
Verifikimi i deputetëve kur hynë dhe dalin nga salla të bëhet në mënyrë eletronike
Analistët politikë thonë se, edhe përkundër se faktit që rregullorja e Kuvendit parasheh që deputeti mund të mos marrë pjesë gjashtë muaj në séance, është pasinqertë dhe e padenjë nga ana e ligjvënësve që në fillim të seancave të firmosin sa për pagën dhe më pas t’ja mbathin prej atyhit.
Njohësi i rrethanave politike në vend, Nexhmedin Spahiu, thotë se bojkotimi i seancës është vërtet një e drejtë e deputetëve, por ata nuk duhet që për arsye private private të dalin nga seanca dhe për faj të tyre të dështojë puna e parlamentit.
“Verifikimi i deputetëve duhet të bëhet jo vetëm në fillimin e seancës por edhe në mbarim të saj dhe konform saj duhet të bëhet edhe pagesa.
Nëse në derën e Parlamentit bëhet evidentimi elektronik ku tregohet se kur deputetët hyjnë e kur dalin atëherë kjo do të ishte një mënyrë më adekuate që më pas ligjvënësit të paguhen edhe për mëditjet pasi do të tregoj saktë sa kanë qëndruar në punimet e Kuvendit. Kështu do të evidentohej dhe dokumentohej saktë se sa qëndrojnë deputetët në seanca”, ka thënë analisti Spahiu, për tesheshi.com.
Rregullorja e miratuar, në interes (të abuzimit) të deputetëve
Njohësi i rrethanave politike në vend, Mazllum Baraliu thotë se deputetët maskimalisht kanë të drejtë gjashtë muaj të mungojnë në seanca për arsye të caktuara dhe mund t’i marrin mëditjet, por jo më tepër.
“Nuk ka ndonjë rregullim preciz për çështjen në fjalë, më shumë është e rregulluar në interes të vet deputetëve pasi ata vet e kanë miratuar se si ju konvenon më së miri. Pra nuk ka ndonjë vijë rigoroze për mospraninë e deputetëve në seanca plenare ose komisione paralamentare”, ka thënë Baraliu për tesheshi.com .
KMDLNJ: Të ndëshkohen deputetët që s’respektojnë mandatin e tyre
Për çështjen në fjalë ka reaguar së fundi edhe Këshilli për Mbrojtjen e të Drejtave dhe Lirive të Njeriut (KMDLNJ) që kërkon t’u hiqen mëditjet deputetëve që ikin nga seancat.
KMDLNj konsideron se të zgjedhurit e popullit, përveçse e kanë shndërruar sallën e Kuvendit në një arenë gladiatorësh, po bëhen dhe pengues të punës, e për më tepër vetëm përfituesë material, të cilët në fund nuk e kryejnë detyrën e tyre, e që në mënyrë të papërgjegjshme shpërdorojnë taksat e votuesve të tyre duke mos i arsyetuar mëditjet por edhe pagën e deputetit me asgjë të dobishme.
“Jemi dëshmitarë që shumë seanca ndërpriten para përfundimit të tyre ose nuk fillojnë fare pikërisht shkaku i mungesës së deputetëve apo shkaku i mashtrimit të tyre jonormal , nënshkruhen në fillim sa për të hyrë në listën e përfituesve të mëditjeve e pastaj shkojnë në vendin e rregullt të tyre të punës , kafiteritë dhe restorantet e qytetit. Është koha e fundit që kryetari i Kuvendit me Kryesinë të shohin mundësinë që përmes ndryshimit të Rregullores së Punës të vendoset një rregull dhe të vendoset një disiplinë e punës me ç’rast deputetët që i bojkotojnë seancat e Kuvendit , ata që kanë sjellje në shpërputhje me mandatin e deputetit të sanksionohen duke ua pamundësuar marrjen e mëditjeve por edhe pagën e deputetëve nëse këto nuk i arsyetojnë me praninë e tyre në seancë dhe angazhim konkret për çka edhe kanë marrë votën”, thuhet në një komunikatë të KMDLNJ-së.
Më tej, ky këshill thotë se lista e të nënshkruarve duhet të kontrollohet dhe në rast të nënshkrimit vetëm sa për mëditje dhe largim nga salla e Kuvendit pa e arsyetuar largimin; nënshkrimet duhet të konsiderohen si të pavlefshme dhe ata deputetë duhet të sanksionohen duke ua hequr mëditjet dhe privilegjet e tjera.
KMDLNJ po ashtu mendon se këtyre deputetëve nuk duhet t’u jepet mundësia të realizojnë vizitë jashtë vendit në emër të angazhimeve kuvendore, sikur as përdorimi i veturave zyrtare për nevoja private , familjare dhe turistike , pavarësisht vendit që e kanë në hierarki. /tesheshi.com/
