Rima Khalaf dha dorëheqjen dy ditë më parë si sekretare ekzekutive e Komisionit Ekonomik dhe Social të Kombeve të Bashkuara për Azinë Perëndimore. Një vendim i kushtëzuar nga presioni mbi të për të tërhequr një raport që e akuzon Izraelin për aparteid ndaj palestinezëve.
Qëndrimi i saj kurajoz e ka nxitur Mahmoud Abbas-in, presidentin e Autoritetit Palestinez, që të premtojë për të shpërblimin me medaljen më të lartë.
Nëpërmjet një bisede telefonike, Abbas ia ka bërë të njohur vetë ish-zyrtares së OKB-së vendimin për t’i dhënë medaljen, duke e falënderuar për besnikërinë ndaj ligjit ndërkombëtar, për qëndrimin e saj ndaj vlerave të vërteta dhe humanitetit.
Ndërsa ajo nuk pranoi të heshtte përpara aparteidit të Izraelit, vendosmëri që e detyroi të jepte dorëheqjen, Mahmoud Abbas i bëri të ditur Rima Khalaf-it vlerësimin e palestinezëve për qëndrimin e saj.
Në raportin e ESCWA-së, të publikuar të mërkurën, thuhet se ka prova dërrmuese që Izraeli ka kryer krimin e aparteidit ndaj popullsisë palestineze. /tesheshi.com/
