Ervin Salianji, deputet i PD-së, ka denoncuar përmes një komenti në rrjetet sociale, kërcënimet që po i bëhen një biznesi në mes të Tiranës, për t´I tjetërsuar pronën, megjithëse ka dokumentacion të rregullt. Sipas ligjvënësit demokrat, kërcënimi po bëhet nga drejtuesit e rinj të hipotekës se nëse nuk paguan ‘haraçin’ për ta prona do ti kalojë një tjetër pronari.
“Drejtues të rinj të hipotekës e kërcënojnë që ose do të paguajë haraçin ose pronën do e regjistrojnë në emër të një individi tjetër, qe biznesi e denoncon që e kanë falsifikuar,” shkruan Salianji.
Në vijim deputeti demokrat thotë se mafia e pronave vazhdon bën kërdinë në çdo cep, diku i merret prona qytetarëve për pallat, diku shkatërrohen pronat pa asnjë dokument, diku transferohen dhe regjistrohen me falsifikim.
“Biznesi me kontratë me shtetin që zotëron një pronë në zonën e ish-bllokut, provon çdo ditë presionin e pushtetit për llogari të mafias qeveritare!
Biznesi dëshmon se drejtues të rinj të hipotekës e kërcënojnë që ose do të paguajë haraçin ose pronën do e regjistrojne në emër të një individi tjetër, që biznesi e denoncon që e kanë falsifikuar!”, shkruan Salianji.
Denoncimi i deputetit të PD-së mbetet disi i paqartë për faktin se biznesi në fjalë, referuar një dokumenti të bërë publik prej tij, ka një kontratë 10 vjeçare me Ministrinë e Ekonomisë, pra është një pronë shtetërore e marrë e qira, bazuar në kushtet e një kontrate, dhe zyrat e hipotekave në raste të tilla nuk kanë lidhje me çështje pronësie.
Kontrata të tilla mund të shfuqizohen vetëm nga institucionet që i kanë lidhur, nëse pika të saj nuk respektohen nga qiramarrësi apo kur ka një interes më madhor. /tesheshi.com/
