Kryesia e kuvendit të Kosovës ka vendosur që të enjten të mbahet seanca e radhës. Por as në këtë seancë ku janë paraparë një mori pikash për diskutim e miratim, nuk është paraparë çështja e marrëveshjes për shenjëzimin e pikës kufitare Kosovë-Mali i Zi. E për këtë, kryekuvendari, Kadri Veseli tha se lidhur me këtë çështje, do të procedohet në bazë të interesave të vendit.
Në përgjigjen e tij lidhur me çështjen e Demarkacionit me Malin e Zi, Veseli tha se duhet të ketë konsensus të përbashkët, siç tha ai, për vendime që janë të mëdha e që kanë të bëjnë me tërësinë territoriale.
“Të shpresojmë se do të kemi një vendimmarrje të shpejtë të vendeve anëtare të Bashkimit Evropian që përfundimisht lëvizja e lirë e qytetarëve tanë të jetë ajo, e cila dihet të jetë në gjithë regjionin, të njëjtën kohë do të procedojmë në bazë të interesave të vendit tonë edhe me çështjen e demarkacionit. Çka është me kryesore, duhet të kemi konsensusin e përbashkët që për vendimet të cilat janë të mëdha dhe kanë të bëjnë me tërësinë territoriale, të kemi edhe konsensus të përbashkët”, tha Veseli.
Ai nuk tregoi se a do diskutohet kjo çështje në këtë sesion, veçse tha se vendimi i kuvendit duhet të jetë në pajtueshmëri me interesat e qytetarëve.
Ndryshe, partitë opozitare në Kosovë kanë paralajmëruar kundërshtim të fuqishëm kurdo që qeveria e dërgon në kuvend çështjen e demarkacionit për ratifikim.
/tesheshi.com/
