Hartimi dhe kalimi në Kuvend i ligjit për dekriminalizimin ndodhet në fazën e vet përmbyllëse, pavarësisht debateve më të fundit mes palëve. Komenti vjen nga kreu i Kuvendit, Ilir Meta i cili gjatë një daljeje të posaçme për mediat nënvizoi se procesi ka progres, edhe pse si tha ai, “kemi 2 nisma me arsyetime të ndryshme”.
“Për ato pak çështje që nuk ka konsensus, të kërkojmë ndihmën e partnerëve ndërkombëtarë, të cilët janë të interesuar për këtë process”, ishte propozimi I Metës, pasi mazhoranca dhe opozita këmbëngulin në draftet e paraqitura e në disa pika ku asnjëra prej tyre nuk është e gatshme të heqë dorë për hir të konsensusit.
Sipas Metës, edhe marrëveshja pozitë-opozitë e vitit të shkuar u arrit falë ndërmjetësimit të dyshes Kukan-Fleckenstein. “Është e qartë se të dyja këto nisma kanë përputhshmëri të gjerë, me disa diferenca që nuk mund të zbehin thelbin dhe nuk mund të bëhen pengesë për këtë proces”, tha Meta.
Procesi i dekriminalizimit kërkon konsensus dhe ndryshime në Kodin Zgjedhor e atë Penal. Për këtë arsye por edhe për faktin se është një përpjekje serioze për pastrimin e politikës, sipas Metës, duhet treguar vullnet e nuk duhen krijuar pretekste. /tesheshi.com/
