Presidenti Nishani i ka shkuar një falenderim i thellë nga ish-të përndjekurit politikë të Kurbinit, për aktin e tij të dekorimit të 65 ballistëve të quajtur martirë, të cilët u ekzekutuan nga forcat komuniste gjatë luftës me në krye Mehmet Shehun.
“Zoti President, ne ish-të përndjekurit politikë të Kurbin dërgojmë urimet më të përzemërta nga iniciativa juaj e zgjuar dhe mjaft kuptimplote për vlerësimin e 65 martirëve që u flijuan nga regjimi diktatorial”, thuhet ndër të tjera në notën falenderuese.
Por antikomunistët kurbinas kanë bërë një gabim në mesazhin e tyre. Fraza “….që u flijuan nga regjimi diktatorial” nuk shkon pasi regjimi ende nuk ishte vendosur. Ngjarja e pushkatimit të ballistëve ka ndodhur në kushte lufte.
Javë më parë, Presidenti Nishani dekoroi si “Martirë” 65 ballistë të pushkatuar gjatë luftës, për ç’shkak provokoi përplasje në politikën e ditës, por dhe debate mbi të kaluarën dhe rolin e forcave.
Ja dhe akti zyrtar presidencial që trazoi edhe më shumë ujrat gjithnjë të fryra të politikës shqiptare: Presidenti i Republikës, Bujar Nishani i akordoi dt. 20/10/2016, nr. dekreti 9771 të rënëve në Masakrën Komuniste të 21 tetorit 1943 Titullin “Martir i Demokracisë” me motivacionin: “Me mirënjohje dhe vlerësim për të gjithë ata burra nacionalistë e të pamposhtur që luftuan për një Shqipëri të lirë, demokratike dhe të vëllazëruar. Në shenjë nderimi për rezistencën e tyre të paepur, deri në sakrifikim, kundër instalimit të regjimit komunist diktatorial në Shqipëri.” /tesheshi.com/
