Nga Blendi Gashi
Deputeti i Aleancës për Ardhmërinë e Kosovës, Daut Haradinaj, ditë më parë kërcënoi me luftë nëse i vëllai i tij, Ramushi, ekstradohet nga Franca për në Serbi. Madje, ai shkoj aq larg sa tha se nëse ndërkombëtarët duan një Kosovë pa komunitetin serb, atëherë le ta ekstradojnë atë.
“Munden me na fut në luftë, asgjë tjetër. Unë nuk e di për të tjerët, por unë e di për vete se në rast se gabojnë dhe bëjnë kësi veprime, atëherë të bëhen gati për tema më serioze”, paralajmëroi ai.
Pas kësaj deklarate të deputetit të Haradinajt plasën reagime jo vetëm nga Beogradi që e quajtën kërcënim, por edhe nga ambasadorë që punojnë në Kosovë.
I ashpër në reagimin e tij është shprehur ambasadori amerikan, Greg Delawie duke e quajtur deklaratën e Haradinajt si “kërcënim për spastrim etnik, dhe se një gjuhë e tillë sipas tij nuk ka vend në Evropë”.
Por njohësit e sigurisë japin versione të ndryshme sa i përket deklaratës së Haradinajt, dhe nëse vërtet mund të plas lufta nëse kreu i Aleancës ekstradohet në Serbi.
“Deklarata e Dautit, emocionale”
Eksperti i çështjeve të sigurisë Naim Maloku, mendon se deklarata e Dautit duhet të merret si emocionale për shkak të momenteve që po kalon familja Haradinaj e jo t’i ipet konotacion tjetër.
Ai shprehet tejet i bindur se Gjykata e Kolmarit do ta lirojë Ramushin, por shton se duhet pritur vendimin e organeve shtetërore sepse vendimi përfundimtar për ekstradim eventual është edhe vendim politik.
“Daut Haradinaj është vëlla i Ramushit, anëtar i ngushtë, pra i një familjeje që dha tre dëshmor dhe që persekutohet pandërprerë qe 18 vite në Kosovën e pasluftës. Nga ky këndvështrim duhet të vlerësohen deklaratat e anëtarëve të kësaje familjeje të shejtë për vendin.
Daut Haradinaj që në moshën 14 vjeçare ka kryer aksione luftarake kundër forcave policore dhe ushtarake të okupatorit. Botrisht dihet, dhe dy herë e vërtetuar në Gjykatën Ndërkombëtare të Drejtësisë, që edhe kur e kanë pasur nën kontroll të plotë krejt Zonën e Dukagjinit në luftën e vështirë të Kosovës për liri, Dauti dhe as Ramushi nuk kanë prekë në civil të asnjë komuniteti. Dauti e tha fjalën e vet dhe më vjen shumë keq që mediat, gjithësesi dashakeqe ndaj familjes Haradinaj, i dhanë aq pompozitet një fjalie të Dautit të dhënë në qastet e ngarkesës emocionale nga krejt kjo që po e përjeton familja e tij”, thotë Maloku për tesheshi. com.
Sipas tij, nëse dikush e çmon kontributin e familjes Haradinaj, atëherë ka mënyra tjera që të bashkëndjejnë me të e jo siç thotë ta dëmtojnë me deklarata koti.
“Njerëz brenda AAK-së e kanë dëmtuar Ramushin”
Eksperti Maloku ndonëse deklaratën e Dautit e quan si emocionale, ai assesi nuk i arsyeton deklaratat e bëra nga zyrtarë të AAK-së që paralajmërojnë eskalim situate në vend, nëse eventualisht ekstradohet Haradinajt në Serbi.
“Kërcënimet se nëse eventualisht ndodhë vendim ndryshe për Haradinajn (ekstradimi në Serbi) mund dhe do të eskaloj situata në Kosovë në aspektin e sigurisë janë deklarata të papërgjegjshme të njerëzve tejet të papërgjegjshëm të cilët të vetmin synim e kanë dëmtimin e Ramush Haradinajt. Jo rrallë herë, gjatë këtyre viteve të gjata të përballjes së Ramushit me akuza absurde të Serbisë dy herë para Gjykatës së Hages dhe tani në Francë njerëz brenda AAK-së të kamufluar se kinse po e duan Ramushin dhe ‘po mërziten e vuajnë’ për të në fakt qëllimshëm apo për shkak se nuk e kanë pasur dhe as që kanë lidhje me politikë e kanë dëmtuar në masë të madhe vet Ramushin”, thotë Maloku .
“Ekstradimi i Ramushit në Serbi do shkatërronte sigurinë në Ballkan”
Njohësi tjetër i çështjeve të sigurisë, Burim Ramadani, për dallim nga Kelmendi, mendon se skenaret e këqija në Ballkan do të përsëriten në formën më të vrazhdtë nëse siç thotë ndonjë “skenarist” i padrejtësisë është çmendur për t’iu përgjigjur pozitivisht kërkesës së Serbisë për ekstradim të Ramushit.
Sipas tij, kjo jo vetëm që do të ishte padrejtësi dhe çmenduri, por edhe do të kishte konsekuenca që nuk mund t’i imagjinojnë “skenaristët” e tillë.
“Një skenar i tillë nuk do të ishte më vetëm lojë! Kjo do të shkatërronte sigurinë rajonale në Ballkan për një kohë jashtëzakonisht të gjatë! Dhe, mungesa totale e sigurisë rajonale këndej, është përkeqësim i thellë i sigurisë kolektive më gjerë, në kohën krizat globale të sigurisë janë shumëfishuar. Serbia edhe Rusia janë çmendur, por bota demokratike jo! Jam i bindur se kjo nuk do të ndodh, sepse besoj thellë që nuk janë çmendur ‘skenaristët’ për të shkaktuar një padrejtësi të tillë të pashembulltë në histori. Dhe, as nuk janë çmendur t’i shërbejnë Rusisë e Serbisë, në planet e tyre për rrëzimin e aktuales në rajon e botë”, ka thënë Ramadani për tesheshi. com. /tesheshi.com/
