Ish-paraardhësi i Cristian Panuçit, bashkëatdhetari i tij Giani De Biassi, i ka dalë në mbrojtje njeriut që po “kryeqëzohet” nga opinioni pas humbjes dërrmuese 0 – 4 nga Skocia.
“Ishte situatë e vështirë për trajnerin, pasi skuadra ishte në inferioritet numerik ndaj një kundërshtari që vraponte shumë. Nuk ishte aspak e lehtë, pasi mungonin disa lojtarë, Roshi, Sadiku dhe tani Hysaj. Ekipi nuk ishte i plotë dhe hasi në shumë vështirësi ndaj një skuadre të fortë. Unë dal në mbrojtje të trajnerit, pasi bën gjithçka mundet me futbollistët që ka në dispozicion”, komentoi ish-trajneri i kuqezinjve, e cili e çoi përfaqsuesen shqiptare deri në Europian.
Vetë Panuçi e morri përgjegjësinë e humbjes, por nuk dha asnjë shenjë vetëlargimi nga pankina, ndërkohë që skuadra e drejtuar prej tij pothuajse ka prekur fundin.
“Sot gabova vetëm unë me zgjedhjet e mia. Lojtarët nuk më tradhtuan, madje bënë shumë mirë dhe u përpoqën gjatë gjithë ndeshjes. Zgjedhjet e mia ishin të gabuara, por duhet të shohim përpara. unë besoj te lojtarët dhe besoj se mund të kalojmë këtë situatë, për të arritur te rezultatet pozitive”, tha Panuçi pas ndeshjes. /tesheshi.com/
