Lëkundjet e tokës të regjistruara ditët e fundit në Shqipëri, sipas Institutit të Gjeoshkencës, quhen mikrotërmete dhe kanë një aktivitet normal, duke pasur parasysh që jemi një vend me aktivitet sizmik.
Por a parashikohen tërmetet?
Rrapo Ormeni, kërkues shkencor në këtë institut, thotë se tërmetet mund të parashikohen, sepse studimet sizmiologjike kanë parashikuar zonat më aktive të vendit.
“Por nuk mund të parashikohen në kohë, sepse tërmetet kanë procese të ndërlikuara në brendësi të tokës dhe shkenca e Sizmiologjisë e shekullit të kaluar kërkon bazën e saj të matjes së të dhënave, që të arrijë të parashikojë dhe kohën e saktë”, thotë Rrapo Ormeni për TCH.
Në lidhje me paralajmërimin e bërë nga kreu i emergjecave civile, Shemsi Prençi, sipas të cilit Shqipëria mund të goditet nga një tërmet si ai i 1967, Ormeni thotë se ka një logjikë shkencore që tregon se tërmetet mesater mund të përsëriten një herë në 50 vjet.
“Tërmetet e fuqishme që janë me magnitudë mbi 7 e kanë një herë në 100 ose deri në 130 vite ciklin e tyre të përsëritjes, e zakonisht ato bien në zonat që sipas Gjeoshkencës rezultojnë aktive. Por koha është e sigurtë që nuk matet, përtej parashikimeve, pasi mund të bien një herë në 100 vite, por mund të bien edhe dy tërmete në 150 vite”, thotë më tej Ormeni.
Por cilat janë qytetet më të rrezikuara nga tërmetet në vendin tonë, sipas studimeve sizmiologjike? Ormeni shprehet se segmenti Elbasan-Dibër ka një thyerje tërthore sizmiogjene, Vlora, Lushnja, Elbasani ka qenë dhe është zona më aktive në vendin tonë. /tesheshi.com/
