Nga Mensur Krasniqi
Nuk është aspak i vogël numri i personave që vazhdimisht po e braktisin Maqedoninë, e për t’ja msy kah Evropa. Kjo edhe ka qenë temë diskutimi në Kuvend gjatë ditës së djeshme. Ajo cka është shqetësuese, ky fenomen i zhvendosjes së qytetarëve nga Maqedonia, nuk paraqet aspak problem për deputetët shqiptarë, sikurse shqiptarët i qëndrojnë besnik Maqedonisë dhe nuk e braktisin asnjëherë.
Kjo është ironizim, meqë në mesin e atyre që lëshojnë vendin shumica janë shqiptarë. Pra, nuk ka familje shqiptare në Maqedoni që nuk ka gati se në cdo shtet perëndimor farefisni.
Derisa deputetët shqiptarë nuk thanë asnjë fjalë për mërgimin e rinisë shqiptare, në këtë rast debati u zhvillua mes deputetëve maqedonas.
Deputetja e PRSD-së, Sonja Mirakovska, në seancën e djeshme, tha se për shkak të kushteve të këqija ekonomike, në vitet e fundit janë zhvendosur nga Maqedonia kuadrot më të mirë, mjekët dhe inxhinierët. Pjesa më e madhe zhvendoset në Gjermani. Sipas saj, në nivel vjetor nga Maqedonia zhvendosen 12 mijë persona, konsideron opozita.
Zhvendosja masive, tha ajo, ka të bëjë me përqindjen e madhe të varfërisë. Siç theksoi Mirakovska, 9 përqind e popullsisë, në Maqedoni jeton me më pak se 100 denarë në ditë.
“150.000 persona janë zhvendosur nga viti 2006. Nuk ka luftë, as konflikt. Ka vetëm një garniturë në pushtet për të cilën njeriu nuk ka rëndësi, për të cilën njeriu paraqet vetëm numër i cili duhet të votojë. Edhe ai duhet të votojë, që të vijë në pushtet një garniturë udhëheqëse, pa menduar për popullin e vet. Shikojeni Raportin e Euro-statit dhe atje qëndron, 20.000 persona në vitin 2013; aq edhe në vitin 2014” deklaroi Sonja Mirakovska nga PRSD-ja.
Nga ana tjetër mazhoranca maqedonase duke u thirrur në të dhënat e Bankës Botërore, thonë që tendenca e zhvendosjes nga Maqedonia është në ulje, pra në nivel vjetor mesatarisht e lëshojnë vendin jo 12 mijë sic pretendon opozita por vetëm 5 mijë persona. Sipas Krsto Mukoskit të VMRO-DMPNE-së, më shumë nga vendi janë zhvendosur në vitet e 90-të gjatë kohës së tranzicionit, kur LSDM-ja ka qenë në pushtet.
“Kjo ndodhi në vitin 1994, kur nga vendi janë zhvendosur 124.000 persona. Kjo ndodhi për shkak të privatizimit kriminel, të cilin e ka zbatuar qeveria e atëhershme e LSDM-së. Prandaj e kemi këtë shifër më të madhe historike”, deklaroi deputeti i VMRO DPMNE-s Krsto Mukovski.
Shqetësimin e tij ndaj mosreagimit të deputetëve shqiptar të BDI-së dhe PDSH-së për fenomenin e ikjes së rinisë shqiptare nga Republika e Maqedonisë drejt vendeve të Bashkimit Evropian, e shprehu edhe analisti politik Afrim Tanallari. Ai në rrjetin social facebook ka shkruar kështu: “Deputetëve shqiptar të BDI-së dhe PDSH-së, nuk ju intereson për emigrimin e rinisë shqiptare në vendet perëndimore. Kjo u dëshmua sot, në seancën parlamentare dedikuar këtij fenomeni. Një llaf, se thanë! E as gojën se çelën! Nejse, kanë punë më të madhe. Nuk e di çka kanë. Zyrtarisht 500 milion euro në vit vijnë nga mërgata shqiptare në R.M. Po i del boja më folklorit. Deputetët borxh ua kishin. Harruan sot, besoj që radhës tjetër jo”, shkroi Tanallari. /tesheshi.com/
