Vetëvendosje e PDK, pos të tjerash janë përplasur dhe për ccështjet e integrimit.
Ndërsa Kurti nuk e sheh pengesë Serbinë për integrim në BE, zyrtarë të PDK-së e fajësojnë atë plus shtetin serb.
“Integrimin e Kosovës në BE nuk e pengon Serbia, por pesë shtetet që nuk na njohin me ç’rast ne nuk mund t’i fusim në të njëjtën kategori në këtë moment. Duhet të punojnë më shumë me Greqinë e Spanjën. Derisa mund të themi se anëtarësimi i Serbisë varet shumë nga Kosova”, tha Kurti të martën në tryezën e organizuar nga Vetëvendosje me temën “Shqiptarët dhe integrimi evropian”, në prag të Samitit të BE-së dhe Ballkanit Perëndimor në Sofje të Bullgarisë ku do të marrë pjesë edhe Kosova si shtet.
Por më ministri i Drejtësisë, Abelard Tahiri që vjen nga PDK e sheh pikërisht Kurtin si një nga fajtorët për integrim e vendit drejt BE-së, duke thënë se është në të njëjtën linjë me presidentin serb, Aleksandar Vuçiç.
“Janë dy pengesa, njëra nga jashtë dhe njëra nga brenda. Është kryetari i Serbisë i cili padyshim që e pengon çdo rrugë të integrimit të Kosovës dhe kryetarin e LVV-së i cili në linjë të njëjtë e pengon integrimin e Kosovës”, ka thënë ministri Tahiri më 28 shkurt në emisionin “Rubikon” të KTV-së.
Ndërsa Mimoza Ahmeti, zyrtare e PDK-së, në shkurt të 2017-tës kur mbante pozitën e ministres për Integrime Evropiane, fajësoi Serbinë për bllokim.
“Serbia po mundohet që në mënyrë direkte dhe indirekte ta pengojë anëtarësimin e Kosovës në organizata ndërkombëtare”, tha Ahmeti në Samitin e komisioneve për Punë të Jashtme të mbajtur në Prishtinë.
Kujtojmë se pesë vendet që nuk e kanë njohur pavarësinë e Kosovës e që janë vende anëtare të BE-së janë: Spanja, Greqia, Rumania, Qipro dhe Sllovakia.
B. Gashi – /tesheshi.com/
