Komisioni parlamentar për Punën, Çështjet Sociale dhe Shëndetësinë u përfshi nga debatet pas raportimit të ministres Ogerta Manastirliu.
Kjo e fundit njohu komisionin me strukturën e re të institucionit që drejton, ndërsa theksoi se në programi e ri të qeverisë parashikohet që deri në vitin 2021, koha e pritjes për të gjithë shërbimet që qytetarët do të marrin në spital, të përgjysmohet.
“Bashkimi i funksioneve të ministrisë i jep fund burokracive. Synojmë t’i japim fund sorollatjeve për personat me aftësi të kufizuara. Struktura e re ofron shërbime të përbashkëta për gratë e dhunuara”, tha Manastirliu.
Por, Petrit Vasili, deputet i LSI-së dhe ish-ministër i Shëndetësisë, tha se ky sektor nuk mund të trajtohet si një ‘one stop shop’.
“Ju nuk mund të jeni Ministria që mban përsipër barazinë gjinore. Shëndetësia s’mund të jetë institucion periferik. Mjekësia nuk mund të kthehet në një “one stop shop”. Kryeministri kur morri votëbesimin tha se prioritet do të jetë diçka tjetër”, theksoi Vasili. /tesheshi.com/
