Ministria e Drejtësisë kërkon që të ketë të drejtë të verifikojë ankesat e qytetarëve për gjyqtarët dhe prokurorët para se ato t’i përcillen për hetim Inspektoriatit të Lartë të Drejtësisë, institucion që do të ngrihet sipas Reformës në Drejtësi. Për ministrin aktual të Drejtësisë, Petrit Vasili, nuk bëhet fjalë për t’i marrë kompetencat e kontrollit Inspektoriatit të Lartë të Drejtësisë, por për trajtimin e ankesave të qytetarëve.
Debati në komisionin e Ligjeve, vijoi me reagimin e deputetes socialiste, Vasilika Hysi e cila i është përgjigjur propozimit të ministrit Vasili. Sipas saj, me miratimin e Kushtetutës, ministri i Drejtësisë nuk ka më të drejtë të marrë të dhëna nga gjyqtarët dhe prokurorët për asnjë çështje dhe institucioni përgjegjës për verifikimin e ankesave, hetimin, dhe fillimin e procedimit disiplinor është Inspektoriati i Lartë i Drejtësisë.
Kryetari i Komisionit të Ligjeve, Fatmir Xhafa, duke risjellë në vëmendje ndryshimet kushtetuese të vitit 2008, tha se ndryshimet duhen bërë brenda kufijve që lejon Kushtetuta duke respektuar balancën e pushteteve. Sipas tij, ministrit të Drejtësisë, i duhet lënë një hapësirë për verifikimin e ankesave para se ato t’i përcillen inspektoriatit për hetimin disiplinor andimistrativ.
Debatet në komisionin e Ligjeve, u bënë ndërsa diskutoheshin ndryshimet në ligjin “Për organizimin dhe funksionimin e Ministrisë së Drejtësisë”. /tesheshi.com/
