Gianni de Biasi, trajneri i kuqezinjve ka marrë titullin “Honoris Causa” nga Universiteti Europian i Tiranës, dhe në këtë ceremoni Kryeministri Rama ka bërë thirrje për sjellje dinjitoze të tifozëve dhe lojtarëve gjatë ndeshjes me Serbinë më 8 tetor.
De Biasi është shprehur i nderuar për këtë titull, duke uruar që ai të sjellë fat për kualifikimin e Shqipërisë.
Tekniku italian është shprehur gjithashtu se, “vetëm talenti nuk mjafton nëse nuk i shton përkushtimin dhe pasionin. Shqipëria ka patur një grup lojtarësh të shkëlqyer.
Ndërkaq, Kryeministri Rama ka kërkuar sjellje të denjë edhe në rast humbjeje me Serbinë në “Elbasan Arena”.
“Në prag të një ndeshje vendimtare, unë dua t’i kthehem bazës së filozofisë së Giannit, që ekziston dështimi, por s’mund ta pranojmë kurrë të mos e provojmë deri në fund suksesin.
Ndeshja është vendimtare për t’u kualifikuar, por është vendimtare edhe për një arsye tjetër, për të bërë diferencën në fushën e lojës, në shkallët e stadiumit, diferencën jo vetëm të trajnerit dhe djemve në fushë, por edhe atyre nënave dhe baballarëve që Gianni nuk harron t’ua kutojë djemve të vet, që meritojnë që jo vetëm djemtë të japin diçka në fushë, por edhe ata që do ndjekin ndeshjen të japin gjithcka për të provuar që ne jemi ndryshe. Ne dimë të këndojmë himnin tone, por ne dimë të respektojmë edhe himnin e kundërshtarit.
Të dalim ashtu siç duan nënat, baballarët e këtij kombi, dhe sic do donin edhe etërit që dhanë edhe jetën e tyre për këtë komb. Një komb që mbetet dinjitoz në fitore, barazim dhe humbje.
Sepse në fund të fundit, siç Gianni më ka thënë se ju thotë lojtarëve në momente të vështira: Vetëm luani, shijojeni lojën”./tesheshi.com/
