Trajneri i kombëtares shqiptare, Gianni De Biasi ka foluar në konferencën e zakonshme para ndeshjes me Danimarkën, të cilën e ka cilësuar si jetike pasi skuadra që ai e drejton ndodhet në gjysmë të rrugës dhe i duhet ende shumë për të bërë në mënyrë që të realizojnë kështu ëndrrën drejt kampionatit Europian “Francë 2016”.
“Kemi arritur rezultate të mira që ndoshta nuk i kishim menduar më parw, por e dimw mirë që kemi bërë vetëm gjysmën e rrugës dhe kemi ende shumë për të bërë. Ndaj Danimarkës, luajmë një pjesë të rëndësishme të objektivit dhe shpresoj që gjërat të na shkojnë siç duhet”, u shpreh De Biasi.
Ndërkohë, De Biasi është ndalur për të analizuar edhe skuadrën rivale duke vlerësuar kështu harmoninë që qëndron brenda grupit të tyre.
“Danimarka është skuadër me lojtarë me shumë eksperiencë dhe shumë e fortë. Ajo që të bën përshtypje është fakti që luajnë si një skuadër e vërtetë dhe duket që udhëhiqen nga një trajner shumë ekspert, që punon prej vitesh dhe në mënyrë të shkëlqyer”, përfundoi De Biasi. /tesheshi.com/
