Përvijohet gjithnjë e më shumë një mundësi e qeverisjes ndërmjet AK Parti dhe kurdëve të HDP, si një mundësi kompromosi kombëtar.
Vijojnë bisedimet në lidhje me koalicionin për formimin e qeverisë së 63-të të Republikës së Turqisë. Kryeministri në detyrë dhe njëherësh kryetari i Partisë për Drejtësi dhe Zhvillim (AK Parti), Ahmet Davutoglu, i shoqëruar nga disa nga emrat më në zë të forcës së tij politike, realizoi sot një takim me delegacionin e Lëvizjes Nacionaliste (MHP), kryesuar nga lideri i saj, Devlet Bahçeli.
“Z. Bahçeli shprehu përsëri vullnetin e Partisë Lëvizja Nacionaliste për të mos u bërë partnerë të koalicionit qeverisës”, deklaroi Kryeministri i Turqisë në një dalje publike pas takimit.
Shefi i Ankarasë zyrtare, Ahmet Davutoglu, zhvilloi të hënën takimin e parë për formimin e qeverisë së koalicionit me kreun e Partisë Popullore Republikane (CHP), Kemal Kiliçdaroglu.
Në raundin e parë të bisedimeve, nisur nga partia opozitare kryesore e Kemal Kiliçdaroglu, Kryeministri në detyrë, Ahmet Davutoglu, do të masë pulsin dhe do të vendosë mbi tavolinë parimet e angazhimet.
Kurse raundin e dytë të bisedimeve Davutoglu planifikon ta nisë sipas rezultateve të turit të parë.
Në rast se qeveria e koalicionit nuk formohet brenda 45 ditëve nga data 10 korrik, që shënon edhe emërimin e Kryeministrit Davutoglu për këtë mision, Turqinë e pret një proces i ri zgjedhor.
