Kryeministri turk, Ahmet Davutoglu, tha të mërkurën se pengmarrësit e prokurorit bënë telefonata me jashtë gjatë aksionit të tyre, duke komunikuar me disa prej bashkëpunëtorëve në vende të huaja.
Gjatë një konference shtypi në Stamboll pas funeralit të prokurorit, Davutoglu njoftoi se kishte urdhëruar nisjen e të gjitha llojeve të operacioneve për gjetjen e bashkëpunëtorëve.
“Nëse dikush, me lidhje të brendshme dhe të jashtme, një shërbim i fshehtë, përpiqet të luajë një lojë, ata kanë për të gjetur kundër tyre një Turqi të vendosur,” qenë fjalët e Davutoglusë.
Mehmet Selim Kiraz, prokurori 46-vjeçar, ndërroi jetë në spital të martën në mbrëmje vonë pasi u qëllua në trup dhe në kokë nga dy terroristët që e mbajtën peng në zyrën e tij. Terroristët u vranë më pas nga policia.
Prokurori i ndjerë po merrej me çështjen e Berkin Elvanit, djaloshit që u plagos gjatë protestave të Gezi Park-ut, e që vdiq në mars të 2014-s pas 269 ditëve në koma.
