Ish-kryeministri dhe ish-kryediplomati turk, Ahmet Davutoglu, një personalitet në nivel strategu gjeopoltik, ka qenë prezent në promovimin e veprës më të fundit të tij përkthyer në shqip, “Qytete dhe Qytetërime”, në kryeqytetin kosovar, Prishtinë .
Kjo në kuadër të 10-vjetorit jubilar të Pavarësisë. Vetë Davutoglu, ka rol historik në këtë, pasi Turqia ishte i pari vend që e njohu Kosovën.
“Si sot me kujtohet 17 shkurti i vitit 2008. Në atë kohë isha këshilltar i kryeministrit Erdogan dhe pasi morëm mesazh së Kosova shpalli Pavarësinë, menjëherë nxitova dhe i thashë që ta njohim sa më shpejt. Dhe kështu u bëmë vend i parë që njohu Kosovën si vend të pavarur”, u shpreh Davutoglu.
Por më interesant në ceremoninë promovuese, ishte një rrëfim i sinqertë i ish-ministrit të Jashtëm Enver Hoxhaj, mik i Davutoglusë. Madje në një moment, ky i fundit falenderoi Hoxhajn që e kish ftuar në Prishtinë.
“Me duhet të them një nga personalitetet udhëheqëse që ma bëri këtë ftesë nga zemra, ishte miku im i dashur Enver Hoxhaj. I jam mirënjohës mikut tim të dashur Enver Hoxhaj, i cili me thoshte ‘eja në shtëpinë tënde!’’; dhe më të vërtetë, Prishtina është shtëpia ime”, u shpreh Davutoglu.
Dhe Hoxha më tej, nxorri nga kujtesa e karrierës së tij diplomatike, një rast kur Davutoglu dhe Erdogan e kishin nxjerrë nga një situatë e sikletshme.
“Isha në Egjipt për të kërkuar njohjen e Pavarësisë së Kosovës dhe aty nuk me njihte askush. Atje ishte edhe miku im Ahmeti i cili më ftoi në një darkë ku ishin të pranishëm qeveritarë të Egjiptit. Më uli afër vetes dhe Erdoganit. Më pas, pasi më pyetën se kush jam, më kanë ftuar të gjithë zyrtarët e Egjiptit. Kontributi i tij dhe i shtetit të Kosovës është i madh. Në 67 organizata ku jemi anëtare është kontributi edhe i Turqisë”, theksoi Hoxhaj.
Nga ana e tij, Davotuglu foli me ndjenja të veçanta për lidhjet e afërta shqiptaro-turke, duke thënë se dhe një kunatë e tij ishte shqiptare
“Kuptohet si dikush që ka jetuar në Stamboll, në mahallë siç i quajmë ne, të gjithë ishim të përzierë me shqiptarë. Njëra nga kunatat e mia është shqiptare, njëri nga miqtë e mi është shqiptar. Ka disa njerëz që dëshirojnë ta bëjnë dallimin në mes turqve dhe shqiptarëve në bazë të disa tendencave nacionaliste. Por mjaft të thuhet se ka më shumë shqiptarë që jeton në Turqi sesa në Shqipëri”, theksoi Davutoglu.
Duke u ndalur te libri i tij, ai tha se e kishte shkruar atë në kohën që ushtronte postin e ministrit të Jashtëm.
Libri është një botim i Logos-A në Shkup, përkthyer nga Rubin Hoxha.
Shkëlzen Rrecaj – /tesheshi.com/
