Kryeministri i dorëhequr turk, Ahmed Davutoglu, njoftoi se partia e tij do të fillojë konsultimet me opozitën për të formuar një qeveri koalicioni, duke theksuar se nuk do t`i japë përparësi formimit të asaj që ai e përshkroi si një qeveri teatrale koalicioni, e cila do ta çonte vendin në zgjedhje të parakohshme.
Davutoglu tha në një intervistë me një nga kanalet lokale se ai do të jap maksimumin e tij në këtë drejtim dhe se do të vazhdojë të jetë me të gjithë, duke theksuar se ai do të kërkojë zgjedhje të parakohshme, vetëm nëse nuk arrihet në një përfundim.
Kryeministri i ngarkuar nga presidenti Erdogan për krijimin e një qeverie koalicioni, tha se ai do të takohet me të gjitha partitë e opozitës dhe se do të bisedojë me ta me sinqeritet, duke shtuar: “Ne jemi të gatshëm për të folur për çdo gjë dhe për të bërë të gjitha dialogimet dhe bisedimet përpara publikut, por kjo me kusht që mos të shkelen parimet kryesore politike të Partisë për Drejtësi dhe Zhvillim.”
Ai theksoi se vetëm kjo parti mund ta udhëheqë një aleancë: “Nëse të tjerët na ndalojnë nga formimi saj, atëherë ne do të shikojmë të gjitha zgjidhjet e tjera”, duke aluduar për zgjedhje të parakohshme.
Ai vuri në dukje se do të flasë sinqerisht me çdo parti të opozitës, pa vendosur vija të kuqe, brenda kontekstit të përcaktuar për të formuar një qeveri të re.
Nga ana e tij, ish-presidenti i Partisë Popullore Republikane turke, Deniz Bajkal, tha se presidenti Rexhep Tajip Erdogan është i hapur për të gjitha zgjidhjet në veçanti edhe për formimin e një qeverie koalicioni.
Baikal theksoi pas takimit me Erdoganin se “sigurimi stabilitetit të vendit, dhe gjetja e një zgjidhjeje për të kapërcyer vështirësitë e periudhës së tranzicionit që zakonisht pason zgjedhjet, është një zgjidhje e nevojshme.” /tesheshi.com/
